KMK-08

KILOMETROAK EGUNEKO ARGAZKIAK

2008-10-27T08:47:00.000-07:00

INAUGURAZIO EKITALDIA

«Lana eginez gozatu nuen Kilometroak egunean»

2008-10-27T08:12:00.000-07:00

Igor Elortza ormaiztegiarra, Gipuzkoako Ikastolek antolatzen duten Kilometroak jaiaren koordinatzaile lanetan aritzen da duela zazpi urtetik. Irurako jaia pasa ondorenean, erabilitako guztia jasotzen eman dituzte egun hauek. Azken hilabete gogorraren ondoren, «lo beharrean» dagoela aitortu zuen.

Nolako emaitzak utzi ditu Irurako Kilometroak egunak?

Zirkuituan izan zen jende kopuruagatik benetan gustura geratu gara. Baita ekitaldiek izan zuten harrera eta parte-hartze handiagatik ere. Ikastolako guraso zein irakasleak ere gustura geratu dira izandako erantzunarekin. Gainera, Renfek zenbakirik eman ez badigu ere, jende askok erabaki zuen trenez etortzea, eta hori lortzea zen gure erronketako bat. Bestalde bizikletaz etortzearen berrikuntzari ere ondo erantzun zion jendeak. Guneak eta zirkuitua bera ere txiki geratu ziren irudipena dugu. Beraz, alde horretatik, aurreikuspenak bete egin ziren.
Emaitza ekonomikoari dagokionez, hori ez da sekula nahikoa izango, beti beharko baita gehiago. Hala eta guztiz ere, oraindik ez daukagu jakiterik igandeko festak zenbateko irabaziak eman zituen.
Behin eta berriz entzun dugu Irura dela orain artean Kilometroak jaia antolatu duen herririk txikiena. Zer dakar horrek?

Alde onak eta txarrak ditu herri txikia izateak. Kontua da horrelako festa bat antolatzeko jende asko behar dela, bai urtean zehar lanean aritzeko eta baita egunean bertan ere; eta herri txiki batean hori falta da.
Bestetik, badu alde ona ere, hurbiltasun handia lortzen da lanean gabiltzanak gutxiago izanda. Horrek asko balio du, giro ona sortu eta lana arinagoa bihurtzen baita.
Horrelako festa antolatzerakoan zer izan da buruhauste gehien eman dizuena?
Batez ere segurtasunak eman digu lana. Aurten esfortzu berezia egin behar izan dugu arlo horretan. Edonon, jende multzo handiak biltzen diren lekuan beharrezko dira hainbat neurri hartzea ezbeharrak gerta ez daitezen, eta gertatzen badira ahalik eta irtenbide onena eman ahal izateko.
Irurako kasuan arazorik handiena, edo gehien arduratzen gintuena ibilbidearen zati batzen N-I errepidearen ingurutik pasatzen zela zen. Arrisku puntu handia zen hori, eta buruhauste ugari ekarri zizkigun. Horrelakoetan, gauzak ondo joanez gero ez dago zertan ezer gertatu. Hala ere, beti dago ankerkeriaren bat egitea, errepidera irtetea esaterako, bururatzen zaion baten bat. Hori ekidin beharra zegoen, eta horrek lan handia ematen du.

Urte osoa lanean eman duzue Kilometroak antolatzeko lanetan ibili zaretenek. Izan al zenuten egunean bertan gozatzeko aukerarik?

Urte osoan bezala, egun horretan ere lanean aritu ginen gelditu gabe. Goizean goiz lanean hasi, egunean zehar lanean segi, eta gaueko ordu bi eta erdiak inguruan amaitu genuen. Hala ere, bitartean ogitartekoren bat jateko-edo tarterik hartu genuen. Eguna lanean eman arren, asko gozatu genuen. Lana gozatuz egin genuen.

Zer izan du ezberdin Irurak gainerakoekin alderatuta?

Azpimarratzekoa izan da urtean zehar egin den ekitaldi sorta. Urte osoan zehar lan handia egin dugu Iruran, ekintza ugari antolatu ditugu. Lehengo urteko azaroan hasi ginen gogor lanean eta ordutik hona ia geratu ere egin gabe eman dugu urtea.

Horrela bat-batean burura etortzen zaizkidanen artean, batetik, Tolosako Leidor aretoan jende andana bildu zuen ikuskizuna egin genuen Pirritx eta Porrotx pailazoekin. Beste batean moda desfilea ere egin genuen, gero herriz herri saltzen direnak erakusteko. Apirilean rally-a antolatu genuen, eta bigarren eskuko produktuen azoka ere bai. Eguneko bereizgarri berriz, jende izugarri hurbildu zela eta giro bikaina sortu zela Irura eta Anoeta arteko ibilbidean.
Nabarmentzekoa da, bestalde, Kilometroak egunaren aurretik irailean bertan izan zirela Irurako jaiak. Festa asko elkarren atzetik, eta horrek erabat nekatuta utzi gintuen.

Behin Irurako Kilometroak jaia igarota, Donostiako Zurriolaren txanda iritsi da...
Hasi dira lanean dagoeneko! Zurriola ikastolari egokitu zaio datorren urteko Kilometroak jaia antolatzea, eta dagoeneko martxan dira zenbait prestaketa lan. Garaiz hasi beharra dago, bestela denbora pasa egiten da. Nik orain atseden hartuko dut. Egun luzeak eta gogorrak izan dira, eta lasaitasuna eta atsedena hartu beharra daukat. Egun hauetan behintzat, lo beharrean nago.

Donostiako Zurriolako Ikastolak onartu du kmk-09 antolatzeko erronka

2008-10-27T08:05:00.000-07:00

Donostiako Zurriola ikastolak antolatuko du KMK'09. Gros-Ategorrieta auzoko ikastetxe honek ezin ditu gaur egun eskaera guztiak bete eta beste eraikin bat egin nahi du. Helburu horrekin hartu du datorren urteko festa antolatzeko ardura.

Ohiko eszena errepikatu zen atzo. Aurtengo KMKen arduradun nagusia, Irurako ikastolako lehendakaria den Sorkunde Irazuk, lekukoa eman zion Gipuzkoako Ikastolen Federazioko lehendakari den Arantza Manterolari, eta honek Zurriolako buruzagiei eman; alegia, Joxe Mari Eizmendi lehendakariari eta Aurkene Mora zuzendariari.

Batez ere Gros, Ulia, Intxaurrondo eta Egiako ikasleak hartzen ditu ikastetxe honek. «Ibaia halako muga bat da. Donostiako erdialdetik, ibaiaz bestaldeko auzoetatik, jende gutxi etortzen zaigu», adierazi zuen Aurkene Mora zuzendariak.
Kontuan izan behar da orain dela urte batzuk Barandiaran Lizearekiko batuketa-prozesuari ekin ziola Zurriolak, eta batze hori burututa dago. Halaxe, Batxilergoko eta Lanbide Heziketako ildoak ugaldu egin ditu.

Gaur egun 958 ikasle ari dira, hasi Lehen Hezkuntzan eta Batxilergoaren bukaera arte. Lanbide Heziketako moduluetan, berriz, beste 78 ikasle ari dira.

Atzo, lekukoa jasotzen, hau esan zuen Eizmendi lehendakariak: «Ikastera etorri gara. Erronka handia da guretzat. Inbidia handia eman digute hor bideoan ikusi ditugun leku-aldatzearen irudi horiek. Seguru lortuko dugula Kilometroak on bat antola-tzea. Indar guztia jarriko dugu horretan. Eskaera bakarra daukat: mesedez kontaidazue zer egin duzuen eguraldi hau izateko, KMK antolatzeko protokoloetan ez baitu honi buruzko ezer esaten».
Irazuk, Irurako lehendakariak, hau opatu zien donostiarrei: «Bakarrik, guk gozau dugun aina giza dezazuela»

Atzoko lekuko-emate ekitaldia ez-ohikoa izan zen. Jeneralean, omenaldi-ekitaldia ere izango da, eta gehienetan ikastolaren sor-tzaileei gorazarre eginten zaie. Atzo ez zen horrelakorik egin.
Ikastolako ekitaldi-aretoan bildutako hezkuntza, politika eta kultura munduetako ordezkariei bi bideo erakutsi zitzaien, non azaltzen baitzen Irurako ikastolaren historia.
Umorez zipriztindutako ekitaldia izan zen. Kike Amonarriz Euskal Telebistako aurkezlea arduratu zen aretoa girotzeaz, horretarako maisu-plantak egiten hasi zelarik. Paper batzuk banatu zituen ikusleen artean, eta hauek bideo-lanetan emandako datu batzuei buruzko galderak erantzun behar zituzten.

Ez-ohiko aurpegiak

Atzoko hasiera-ekitaldira politika munduko ordezkari ugari agertu ziren. Alderdi nazionalista eta abertzaleetako ordezkariez gain, atzokoan PSEko kide bat azaldu zen, Rafaela Romero, Ba-tzar Nagusietako lehendakaria.
Saiatu zen kazetarien aurrean adierazpen labur batzuk euskaraz egiten.
Beste ez-ohiko aurpegi bat Xabier Azanzarena izan zen. Euskararen Nafar Institutuko zuzendaria oso bigarren planoan egon zen goiz osoan zehar, bere burua nabarmendu gabe. Inoiz Patxi Baztarrika Eusko Jaurlariztako Hizkuntza Politikarako idazkariarekin hitz egin zuen; jakina denez, bi erakunde hauek elkarlanean hasiak dira, urteetako etenari amaiera emanda.

JENDE UHOLDEA

2008-10-27T07:04:00.000-07:00

Milaka lagunek egun pasa ederra

egin zuten atzo Irura eta Anoeta bitartean antolaturiko zirkuituan

Une heldu da; eta pasa da... Bizikletaz, autobusez, autoz, trenez eta oinez. Era guztietako garraiobide ailegatu ziren atzo goiz goizetik euskaltzaleak Irurara. Denak ere asmo berdintsuarekin, ongi pasatzea eta jai giroaz gozatzea. Hotz egiten bazuen ere goiztiar ibili zen jendea, eta 10:00etarako ibilbideko kaleak beteta zeuden. Hotzari aurre egiteko hainbat aukera erabili zituzten euskaltzaleek: batzuk arropa, besteek edaria eta zenbaitek dantzan hastea.

Bost gune zituen ibilbideak, orotara, sei kilometro eta erdiko bidea osatuz. Batzuk, egunari hasiera emateko ibilbide guztia zeharkatu zuten. Gune bakoitzean zer zegoen ikusi ondoren, arratsaldea non pasa aukeratzeko. Guraso gazteak haurrak soinean zituztela ikusi zitezkeen, baita Kilometroen jarraitzaile beteranoak ere. Hau da, lehen ikastolak eraikitzen lagundu zutenak. Kilometroetan adin, sexu eta jatorri guztietako lagunentzat egon zen tokia. Horren adierazle izan zen, urtero 100.000 pertsona inguru hurbiltzen zirela Ikastolen aldeko festara.

Urtero irudi berdintsuak errepikatzen direla esan daiteke: agintariak zinta mozten, aldarrikapenak, jende ilarak ibilbidera sartzeko, jokuak, kale animazioa, kontzertuak, bertsolariak eta haurren jolasak. Baina hala ere jendea ez da aspertzen eta egun paregabea izaten da gehienentzat.

Guneetan ekitaldi ugari

Goizean nahiz arratsaldean ekitaldi ugari izan ziren eta guztiek izan zuten gozatzeko aukera: kontzertuak, dantzaldiak, kirolak, jokoak, janaria, edaria, haurrentzako ekitaldiak,... Ez zen ezer falta. Jendeak ere ondo erantzun zuen eta gune guztiak bete ziren. Bisitariak gune guztietan zabaldu ziren eta ez zen gune hutsik izan. Egunak bereak egin du eta biharamunarekin guztia biltzeko unea heldu da...

Antolatzaileen garraio publikoaren aldeko deialdiari "ondo baino hobeto" erantzun zion jendeak

2008-10-27T06:28:00.001-07:00

Antolakuntzak atzoko egunaren balorazioa egiteko garaian bi hitz erabili zituen: "Ona eta sekulakoa". Eguraldia lagun, jendetza ikaragarria bildu zen atzo Iruran eta Anoetan, ibilbideak bi herriak har-tzen baizituen. "Etorri den jende andana kontuan hartuta, eta Kilometroak-08k eskaini duen zerbi-tzuari erreparatuta, irakurketa ona besterik ezin dela egin" adierazi zuten antolatzaileek.
Esan zutenez, hainbestekoa izan zen bildutako jende kopurua, ibilbidean moldaketa txiki batzuk ere egin behar izan zituztela antolatzaileek. Esaterako, bazkal orduan, Anoeta eta Irura arteko zubia zabaldu egin behar izan zuten. Ordu horretan, izan ere, Anoetako Renfeko geltokira oraindik jende asko iristen ari zen.

Jende pilaketak sortu ohi dituen arazo txikiak baino ez ziren gertatu ordu horretan. Batik bat, galdutako umeak izan ziren arazo horien iturri. Dena dela, antolatzaileak gustura agertu ziren, aurten abian jarritako identifikazio eskumuturrekoen sistemak asko erraztu baizuen lan hori.

Aurtengo jaiak berrikuntza ugari zituen eta hauetaz ere antolatzaileek irakurketa baikorra egin zuten. Txirrinduentzako aparkalekuak bete egin ziren, topalekuetan ere joan etorria etengabea izan zen eta bluetooth bidez milaka jendek informazioa jaso zuen.

Arratsalderako, ogitartekoak ia agortuta zeuden 2.000 lagunetik gora bazkaldu eta gero

jantokiak beteta Txosna eta jantokiekin ere gustura zeuden. Jantokiak bete egin ziren -2.000 lagunetik gora izan ziren bazkaltzen-. Txosnetan, arratsaldeko lehen orduetan ogitartekoak ia agortzen ari ziren. Garraio publikoaren erabilera izan zen, aldiz, antolatzaileek gehien azpimarratu zutena. Izan ere, Iruratik egindako deialdiari ondo baino hobeto erantzun zion jendeak, eta hori izan zen festara bertaratutako gehiengo handi batek erabili zuen garraiobidea.

Kilometro eguneko ekitaldien bideoak

2008-10-27T06:02:00.000-07:00

kilometroak 2008ko eguneko inaugurazio ekitaldia

2008-10-27T05:49:00.000-07:00

Antolatzaileek egin duten balantzea "oso ona" izan da

2008-10-27T05:22:00.000-07:00

"Etorri den jende andana kontuan hartuta, eta Kilometroak-08k eskaini duen zerbitzuari erreparatuta, irakurketa ona besterik ezin dela egin" iritzi diote

Kilometrotako antolatzaile eta arduradunek gaurko egunaren balorazioa egin dute. Orokorrean, "balorazioa bakarra da: ona, oso ona", azaldu dute. "Etorri den jende andana kontuan hartuta, eta Kilometroak-08k eskaini duen zerbitzuari erreparatuta, irakurketa ona besterik ezin dela egin" iritzi diote. Jendetza bildu da Iruran eta Anoetan, ibilbideak bi herriak hartzen baititu, eta hainbestekoa izan da bildutako jendearen kopurua ibilbidean moldaketa txiki batzuk ere egin behar izan dituztela antolatzaileek. Esaterako, bazkal orduan, Anoeta eta Irura arteko zubia zabaldu egin behar izan dute. Ordu horretan, izan ere, Anoetako Renfeko geltokira jendea iristen ari zen oraindik.

Jende uholdeak sortu ohi dituen arazo txikiak baino ez dira gertatu balantzea egin dutenerako, hau da, arratsalde hasierarako. Batik bat galdutako umeak izan dira arazo horien iturri. Dena dela, antolatzaileak "gustura" daude, aurten abian jarritako identifikazio pultseren sistemak "asko erraztu" baitu lan hori ere.
Aurtengo beste berrikuntzei dagokienean, antolatzaileek "irakurketa baikorra" egin dute: "Bizikletentzako aparkalekuak bete egin dira, edoskitze puntuetan egun osoan izan da joan-etorria eta bluetooth bidez milaka jendek jaso du infomazioa, une oro".
Txosna eta jantokien funtzionamenduarekin ere "gustura" agertu dira antolatzaileak. Jantokiak beteta izan dira, eta 2.000 lagunetik gora izan dira bazkaltzen horietan. Txosnetan, berriz, arratsaldeko ordu horietarako ia agortzen ari ziren ogitartekoak.
Garraio publikoaren erabilera izan da, bestalde, antolatzaileek gehien baloratu duten puntuetako bat. Izan ere, antolatzaileek egindako deialdiari "ondo baino hobeto erantzun dio jendeak", eta hori izan da Irurara joandako gehiengo handi batek erabili duen garraiobidea. Hortaz, antolatzaileak eskerrak eman beharrean aurkitu dira, jendeak esandakoari kasu egin eta halako egun baten antolaketa lana erraztu dutelako. Halaber, etorritako guztiei eman dizkiete eskerrak, eta batik bat "eguna hain ondo irten dadin lagundu duten boluntario guztiei".

Irurako ikastolaren eraikin berriaren inaugurazioa

2008-09-08T12:51:00.000-07:00

Ikastola berriari, irribarrez

2008-09-08T12:04:00.000-07:00

Kilometroak 08 festa handia iristeko hilabete eskas falta denean, Irurako ikastolaren eraikin berria inauguratu zuten atzo. Emozioa eta urduritasuna sumatzen dira dagoeneko

Ikasturte berriaren hasierarekin batera, malkoak marruak nagusitu dira aste honetan zehar ikastetxe askotan. Irurako ikastolan, aldiz, irribarreak eta poza izan dira maisu. Ikasleek ostiralean estreinatu zuten eraikin berria, modernoa eta polita, eta atzo egin zuten inaugurazio ofiziala. Poza eta emozioa airean, baina urduritasuna ere sumatzen zen. Izan ere, hilabete eskas falta da Kilometroak 08 jai handia Iruran ospatzeko.

Hala ere, urriaren 5a iritsi artean, ikastolaren eraikin berria martxan jartzeko astia izan dute iruratarrek. "Ametsa egi bihurtu da. Orain dela 13 urte 700 biztanle ginen eta gaur egun 1.500 gara. Hazkundea izugarria izan da eta herri bizi bat izateko herritarrei zerbitzuak eman behar zitzaizkiela argi genuen udaletxean. Kultur etxea, osasun zentroa eta frontoia egin ditugun bezala, ikastola berria egitea guretzat beharrezkoa zen", azaldu zuen Marimi Ugalde alkateak, emozioz.
6-12 urteko haur eta gaztetxoek gozatu ahal izango dute ikastola berriaz. Haurreskola eta 6 urte bitartekoen gelak, aldiz, eraikin zaharrean kokatuko dira.

Irurako alkateak eskerrak eman zizkien hainbat urtetan ikastolaren proiektuan sinistu duten guztiei. "Erronka handi bat dugu laster: Kilometroak jaia. Urte osoan zehar laguntza handia jaso dugu, bailara osotik iritsi dena. Eskerrak eman nahi dizkiegu denei eta laguntzen jarrai dezaten eskatu", azaldu zuen Ugaldek.

Era berean, Arantxa Manterola Gipuzkoako Ikastolen Elkarteko lehendakariak ikastolen arteko "elkarlana" goraipatu zuen. "Erronkari beldurrik ez diotela erakutsi dute Iruran eta Kilometroak jaia antolatzen ausartu dira, herri txikia izanik. Bailarako ikastolek laguntza osoa eskaini diote eta esan beharra dago elkarlan hori ikastolen ezaugarri bereizgarri bat dela eta eredugarria dena, gainera", gaineratu zuen Manterolak.

Eraikina erabiltzeko ordua iritsi da

2008-09-08T11:56:00.000-07:00

Etzi egingo dute Ikastolaren eraikin berriaren inaugurazioa; bihar dagoeneko ikasturtea hasiko dute bertan.

Irurako Ikastolaren eraikin berria etzi inauguratuko dute. Halere, bihar dagoeneko ateak irekiko dituzte ikasleentzat, ikasturte berezi honi hasiera emanez. «Gauza garrantzitsua da eraikina eta inaugurazioa egitea egoki ikusi dugu», azaldu du Josune Aiestaran Ikastolako zuzendariak.

Inaugurazioa etzi goizean izango da. 12:00etan hasiko da ekitaldia, Irurako dantzarien agurrarekin. Ondoren grabazio bat ikusteko aukera izango da. Sorkunde Irazu Ikastolako lehendakariak hartuko du hitza jarraian, eta gero ikasle ohiek bibolina joko dute. Ondoren, Marimi Ugalde Irurako alkatearen txanda izango da eta jarrain Ikastolen Konfederazioko kide batek hitz egingo du. Ekitaldia amaitzeko bibolin-joleek beste saio bat egingo dute eta ondoren eraikin berriaren ateak zabalduko dituzte bertaratuko diren guztientzat. Azkenik, herriko frontoian hamaiketakoa egingo dute.

Herriari zabaldua

Jende ugari gonbidatu dute Ikastolakoek. Bai eskualdeko beste ikastoletakoak, bai Irura, Anoeta eta Tolosako Udaleko ordezkariak, Irurako Ikastola sortu zutenei eta lehen promozioan izan zirenak, Ikastolari laguntzeko beti prest agertu direnei, Partaideko, Hezkuntza Saileko eta Ikastolen Elkarteko kideei eta baita, noski, Kilometroetako antolakuntza jarduten dutenei.

Gonbidatu guzti horiez gain ere Josune Aiestaranek eta Sorkunde Irazuk nabarmentzen dute Irurako herritar guztiei zabaltzen zaiela gonbitea. Aiestaranek gaineratzen duenez, «eraikin berriaren areto nagusia herriko areto handiena izango da eta herriak etekin handia atera behar dio horri». Aretoak bere kanpoko sarrera independientea du.

Eraikinari berari dagokionez, azkeneko ikutuak falta dira, dena behar bezala egoteko eta egunotan ari dira horiek lotzen. Hezkuntza sailak dagoeneko eman du baimena eraikina erabili ahal izateko. Ikastolaren ametsa, beraz, bihartik aurrera hasiko da betetzen, eraikin berria erabiltzen hasten direnean.

«Oso ilusionatuta gaude eraikin berriarekin», zehaztu dute Aiestaranek eta Irazuk. «Oso harro gaude lan handia egin dugulako eta ikasturte berria eraikin berrian hasiko dugulako». Eraikin berrian Lehen Hezkuntzako ikasleak ariko dira. Ikasleak ere ilusionatuta daude eta eskolako materiala eramaten lagundu zuten.

Egindakoak emaitzak ematen

Eraikin berria ordaintzen lagunduko dien egitasmoa da aurtengo Kilometroak. Hilabete besterik ez da falta egun handirako eta horretarako prestaketak ere aurrera doaz. Sorkunde Irazuk azaltzen duenez, «urte osoan egin dugun lanak emaitza ematen ari dira orain». Azken urtean zehar hainbat ekitaldi egin dituztela eta guztiak «oso ondo atera» direla zehaztu dute. Bereziki rallya aipatu dute, «Kilometroak txiki bat bezalakoa izan zen eta dena ondo atera zen». Hori bai, boluntario bila jarraitzen dute urriaren 5eko ekitaldi erraldoiarentzako. Lagundu nahi duenak deitu dezake 636 724 827 edo 676 44 80 66 zenbakietara edo idatzi kmk.gizabaliabideak@ikastola.net helbidera.

Ikastola Berria

2008-07-30T02:36:00.000-07:00

KMK-08 ko bideoklipa" OINARRIA ERAIKITZEN "

2008-07-22T11:47:00.000-07:00

'oinarria eraikitzen' kantuaren hitzak

Ikastola berria.

Sortu,

helburuak lortu, gertu, garena agertu.

Zama, taldeak darama,

lana, jasoa, emana.

Herria egiten, geroari eragiten.

Biharrari arnas, orainak emanaz.

Unea heldu da, Irura da jomuga amestutako hura lortzeko ardura.

Geroa egiten, Herriari eragiten, ekiten...

Orainari arnas, biharko emanaz.

Unea heldu da, Irura da jomuga,

amestutako hura lortzeko ardura.

Eta heldu da Irura helburura, amestutako hura daukagu eskura.

Ikastola berria, garenaren neurria, Irurako herria, biharko oinarria. Azkeneko harria denoi esker jarria,

Ikastola berria, oinarria... Eraikitzen,

eraikitzen, luberritzen, eraikitzen.

Eraikitzen, hautsak astintzen, maldak berdintzen, oinarria ipintzen, geroa hurbiltzen.

Eraikitzen, erabiltzen, nahiak biltzen, oinarria ipintzen,

zuekin handitzen.

KMK-08ren EKITALDIA: 'OINARRIA ERAIKITZEN' KANTAREN ETA BIDEOKLIPAREN PRENTSAURREKOA

2008-07-22T11:34:00.000-07:00

Lehenik eta behin mahaikideak aurkeztu ditu Igor Elortza moderatzaileak, eta ondoren bideoklipa aurkeztu eta ikusi ahal izan da Koldo Mitxelena Kulturunean bertan. Horren ondoren bideokliparen inguruko xehetasun batzuk eman ditu Igorrek berak.

Kilometroak 2008ko irudiaren sortzaile Tolosako ZUT diseinu etxea izan da, eta beraien ideia batean oinarriturik eta haiek eginiko gidoipean Run Down-e produktorak eginiko lanaren ondorioa da Kilometroak 2008ko bideo promozional hau, Carl Watermark-en zuzendaritzarekin. Halakoetan egin ohi diren bideoen desberdina egitea bilatu da. Horregatik nahastu dira 3-D infografiak eta irudi errealak.

Grabazioa Tolosako Bonberenean egin zen ekaineko bi arratsaldetan, baina lanaldi osoaren atalik gogorrena edo konplexuena bi aste iraun duen muntaia izan da.

Bideoan agertzen diren pertsonaiak Irurako ikastolako haurrak, gurasoak eta aiton-amonak dira. Hauekin batera Kilometrotako aurtengo ekitaldiko kanta egiten aritu den lan taldeko partaide ugari agertzen dira bideoan, Desordutan taldeko kideak, Bonberenea txarangakoak, Jone (kantaria), Gorka (Izeba Pilarren Ilobak taldeko kidea), Aritz (Deabruak Teilatuetan taldeko abeslaria) eta Aitor Mendiluze (bertsolaria eta KMK kantako letraren egilea). Bideogilearen aldetik adierazi oso erreza eta atsegina izan dela guztiekin lanean aritzea eta azken produktuarekin oso gustura daudela. Orain orokorrean jendeari gustatzea espero dugu, eta horretarako medioei eskatzen zaie bideoaren zabalkundean laguntzea.

Horren ondoren Joseba Aranburu “Txus” Desordutan taldeko kideak hartu du hitza, eta bi puntuetan zentratu da nagusiki. Batetik antolakuntzaren deia nola hartu zuten adierazi du, kantua baino gehiago proiektuaren osotasuna aurkeztu zitzaiela eta beraiek horren gidaritza egitea zela eskatzen zitzaiena, eta inolako ezbairik gabe onartu zutela. Proiektua kantua bera baino zabalagoa izan da, kolaborazioak, Kilometroak 2008n beraren ezagutza haundiagoa eta bere helburu guztiekin bat egitea. Horrekin batera kolaboratzaile guztiak eskertu nahi izan ditu, Mulanbo perkusio taldea, Bonberenea txaranga, Jone kantaria, Izeba Pilarren Ilobak taldeko Gorka eta Deabruak Teilatuetan taldeko Haritzen partaidetza batetik eta Bonberenean grabazioan, entseguetan eta abarreko lanetan parte hartu duten kide guztiak bestetik.

Aitor Mendiluzek hartu du hitza segidan eta egindako hitzek Kilometroak berak eta zabalago ikastolak herrian suposatzen dutena laburbildu nahi izan duela adierazi du, elkarlana, helburak lortzea eta partaidetza.

Bukatzeko Igor Elortza koordinatzaileak prozesu guztian parte hartu dutenak eskertu ditu eta medioei beronen zabalkundea egiteko deia luzatuz amaitu da prentsaurrekoa.

2008-07-14T05:58:00.001-07:00

Afrikako bihotzean Kilimanjaroren puntan nahiz magalean...euskera bihotzean....

IKASTOLA BERRIRA LEKUALDATZEA

2008-07-08T13:06:00.001-07:00

Garagardoaren helburu anitzak

2008-07-07T08:26:00.000-07:00

Irura Garagardoaren kolorearen atzean zapore eta helburu ezberdinak aurkitzen dira Irurako VI. Garagardo Azokan.

Irurako VI. Garagardo Azoka herenegun jarri zuten martxan. Atzo eta gaur ere kupelak zabalik egongo dira, baita zer jan eta zer erosteko aukera ere.

Musika kontzertuak

Saltxitxa, ukondo eta bakailaoak egarria sortzen baldin badu, garagardoa edan behar da egun hauetan Iruran. Garagardoak gorputza mugitzeko gogoa sartzen baldin badu, kontzertuak ikusi eta entzun behar dira Garagardo Azokan; 500 lagun espero zituzten afarian.
Herenegun Ibaia taldeak eskaini zuen euskal musika emanaldi «goxoa» eta atzo Iban bakarlaria entzuteko aukera egon zen. Ondoren Irurako rock gogorraren doinuak zabaldu zituzten Nekro taldeko kideek oholtza gainetik.

Ikastola berriaren alde

Kilometroetako arropak saltzeko guneaz gain, Garagardo Azokan ikasleek eginiko eskulanak aurkitzen dira salgai. «Irabazitako dirua ikastolarako ematen dute ikasleek. Honen ordainetan azken egunean afari bat egiten dute».

Hasi garagardo pitxarrak betetzen!

2008-07-07T08:18:00.000-07:00

Atzo ireki zituen ateak Irurako garagardo azokak. Lehendabiziko tragoa antolatzaileek hartu zuten. Hamar garagardo ezberdin dastatzeko aukera izango da igandera arte herriko frontoian. Aurtengoan ere ikastolaren alde egingo dute ekitaldia eta are bereziagoa izango da, herri guztia Kilometroen urtean murgildua baitago. Hala, Ikastolaren eraikin berria rdaintzeko dirua ateratzea da helburu nagusiena. Aipatzekoa da 50 lagun inguruko ariko direla lanean egun hauetan.

BIZIKLETA FESTA PAREGABEA

2008-07-05T15:40:00.001-07:00

KALEJIRA MULANBOREKIN ETA ONDORENGO FESTA

Tolosako Zerkausian egindako 'Bizikleta festa' ikusgarria izan zen

2008-06-29T10:44:00.000-07:00

Grabatu berri den Kilometroak 08ko abestia entzungai izan zuten partehartzaileek

Tolosako Zerkausian atzo arratsaldean KMK-08ren egitasmoaren barruan egindako Bizikleta festa paregabea bezain ikusgarria izan zen. Eguraldi ona lagun zutela, Tolosako Zerkausiko goiko solairuan egin zen arratsaldeko 4:00etan hasteko zen ekitaldia. Ordu horretatik aurrera parte-hartzaileek bizikleta eta gorputza astintzeko aukera ederra izan zuten eszenatoki ezin hobean. Uzturre mendia aurrez aurre eta Oria ibaiaren uraren freskotasuna ondoan zutela, kirola egiteko eta, aldi berean, inguruneaz gozatzeko unea aprobetxatu ahal izan zuten Irurako ikastolaren alde ekitaldian parte hartu zuten lagun guztiek. Antolatzaileek adi-tzera eman zutenez «eguraldi ederra eta eguzkiaren epeltasuna lagungarri izan dira, gaur arte izena emana ez zutenak ekitaldian parte hartzera animarazteko».

Guztira, 150 pertsona inguruk parte hartu dute, azken orduan 40 bat lagun eman baitzuten izena Zerkausian bertan. Lau ordu bizikleta gainean KMK 08 aldeko bizikleta festan 10 monitore aritu dira partehartzaile guztiak gidatzen. Tolosaldeko eta Goierriko polikirodekiak utzitako 86 bizikleta behar izan ziren ekitaldi hau aurrera atera ahal izateko.

Lehen parte-hartzaileak arratsaldeko 15:30ean hasi dira inguratzen eta 16:00etan puntuan eman zaio hasiera lehenengo saioari. Azkenean iragarrita zegoen modura, ordubeteko lau saio egin dira eta saio bakoitzean hiru monitore aritu dira gidari-lanak egiten. Bertaratu direnek argi utzi dute sasoi betean daudela, izerdi-patsetan amaitu baitute batek baino gehiagok, baina, aldi berean, pozik egindako lanarengatik. Saio bakoitzeko parte-hartzaileen artean, 16 kanpin-denda eta 12 kirol-jantzi zozketatu dira.

Egun honetan bertan, Kilometroak-eko ekonomia batzordeak bi lagunentzako afari eder bat zozketatu du, beren laguntza emanez parte hartu duten merkatarien elkarteko kideen artean. Era berean, baita asteburuko hiru egonaldi ere, landetxe batean, merkatari horien saltokietan erosi duten bezero guztien artean. Antolatzaileak, ekitaldiak izan duen harrera eta denek egindako lana ikusita, oso pozik agertu dira arratsaldearen azken orduetan.

Kanta entzungai
Zerkausian bizikleta gainean, ikusle modura edo inguruan pasa zirene oinezkoak grabatu berri den Kilometroak-2008ren abestia entzun ahal izan zuten arratsalde osoan zehar. Giroa alaia izan zuten Bizizkleta festan parte hartu dutenek eta baita hau bukatutakoan Zerkausi eta Triangulora ingurutu diren guztientzat, denak ere Bonbereneako festara joateko aukera izan baitute. Txaranga, erraldoi eta buruhandiak izan dira bertan eta kalejiran ibili ziren kalez kale Mulanbo taldea eta Bonbereneako txaranga ere lagun zituztela. Gaueko 21:00etatik aurrera, konztertua egon zen Bonberenean bertan, Desordutan eta lagunak, In de kitxen eta DJ. Bullekin goizaldera arte parranda egiteko aukera egon zen.

Cycling-a eta Bonberenearen festa Kilometroak 2008ren baitan

2008-06-29T10:33:00.000-07:00

Bizikleta festa arratsaldean izan zen Zerkausian, eta Bonbereneakoen eskutik jarraitu zuen gero.

Zerkausiak atzo beste itxura bat hartu zuen, Kilometroak 2008 egitasmoaren barruan Bizikleta Festa antolatu baitzuten. Hori dela eta, 16:30etik aurrera Zerkausi inguruan nabarmena izan zen festa eta kirol giroa.

Guztira, 150 pertsona inguruk parte hartu zuten eta 10 monitore eta 86 bizikleta behar izan ziren ekitaldi hau aurrera atera ahal izateko. Ordubeteko lau saio egin ziren eta saio bakoitzean hiru monitore aritu ziren gidari-lanak egiten. Saio bakoitzeko parte-hartzaileen artean, 16 kanpin-denda eta 12 kirol-jantzi zozketatu ziren. Kilometroak-2008ren abestia, orain dela gutxi grabatua, entzungai izan zen arratsalde osoan zehar.
Atzo ere, Kilometroetako ekonomia batzordeak 2 lagunentzako afari bat zozketatu zuen. Baita asteburuko hiru egonaldi ere, landetxe batean, laguntzaile diren merkatarien saltokietan erosi duten bezero guztien artean.

Bonberenea Festa

Bizikleta Festa amaitu baino lehen Bonbereneako kideak jada kalean ziren, Tolosako bazterrak alaitzeko asmoz. Izan ere, atzo Bizikleta Festaz gain, Kilometroak 2008 egitasmoaren barruan Bonberenea Festa antolatu baitzuten.

Erraldoiak, buruhandiak, Mulambo eta Bonberenea txaranga Tolosako kaleetan ibili ziren. Festa honen helburu nagusia KMK-08 inguruan lan egin duten pertsonei festa bat eskaintzea zen, herriko bazterrak alaitzeaz gain eta baita jendea Bonbereneara hurbiltzea ere, izan ere, kalejiran ibili ondoren gauean kontzertuak izan ziren gaztetxean bertan, baita dj bat ere. Hasieran Desordutan taldearen txanda izan zen eta ondoren In de kitxen taldeak jo zuen. Amaitzeko DJ-Bull-ek musika jarri zuen.

Eraikuntza bukatzen

2008-06-26T11:58:00.001-07:00

Zerkausiaren gainean, pedalei emanez

2008-06-24T12:16:00.000-07:00

Kilometroak 2008k Bizikleta Festa antolatu du hilaren 28ko arratsaldean, Tolosako Zerkausiaren terrazan.

Kilometroak 2008ko Ikuskizun Batzordekoei, zer antolatu pentsatzen ari zirela, azkenaldian arrakasta izaten ari den kirol praktika bat etorri zitzaien burura: spinning edo cycling, hau da, musikaren erritmora bizikleta estatiko batean pedalei eragitea. Eta horrela sortu zen Bizikleta Festa egitearena: ia 100 lagun cycling egiten Tolosako Zerkausiaren gainean.

Xabier Saizarrek, Irurako Ikastolako irakaslea eta Bizikleta Festaren antolatzaileetako bat, azaltzen duenez, «ideia polita iruditu zitzaigun hainbeste jende batera Kilometroen alde pedalei ematea Zerkausia bezalako leku batean».

Hilaren 28an egingo da ekitaldia. 16:30ean hasiko da eta lau saio izango ditu, bakoitza 50 minutukoa. Guztira 92 bizikleta izango dira eta partaide bakoitzak saio batean edo lauretan parte hartu ahalko du. Saio batean izena ematea 10 euro balio ditu, bitan 18 euro, hirutan 26 euro eta guztietan 34 euro.

Festa hau antolatzeko Anoetako, Ibarrako, Villabonako, Tolosako eta Ordiziako kiroldegien laguntza izan dute. «Zailena bizikletak lortzea zen eta kiroldegi horiei guztiei esker izango ditugu», dio Saizarrek. Antolakuntzak edatekoa jarriko die parte-hartzaileei. Eskuhoiala beharrezkoa da eta hori bakoitzak berea eman beharko du.

Giro berezia
Monitoreak Tolosako, Villabonako eta Anoetako kiroldegikoak izango dira eta Bizkaiatik etorriko diren bi lagun. Anoetako kiroldegiko arduraduna den Onintza Arregi izango da monitoreetako bat. «Festa berezia izango da. Cyclingarekin gehiago disfrutatu daiteke gero eta jende gehiago batera parte hartuz gero», dio Arregik. «Giro berezia izango da, partaideak leku ezberdinetakoak izango direlako eta monitoreak ere ezberdinak izango dira». Antolatzaileek azaltzen dutenez, ekitaldia ez da maratoi bat bezala pentsatu. «Festa bat da», dio Saizarrek. «Horregatik ahal den jende gehienak izena ematea gustatuko litzaiguke».

Txanda bakoitzean hiru monitore izango dira. «Bakoitzak bere estiloa du», dio Arregik, «eta hori ere interesgarri a izango da partaideentzat». Dagoeneko eskaintzen diren lekuen erdiak baino gehiago hartuak daude. Kontuan izan behar da ere, festaren amaieran kirol materiala zozketatuko dela.
Galderaren bat izanez gero, kmk.ikuskizunak@ikastola.net helbidera idatzi edo 688 65 80 04 zenbakira deitu daiteke. Festan parte hartzeko www.kilometroak.net helbidean sartu eta bertan eman behar da izena.

Gipuzkoako Eskolarteko 28.Bertsolari Txapelketaren finala Iruran

2008-06-02T12:19:00.000-07:00

Jende ugari izan zen atzokoan Iruran jokatutako Gipuzkoako 28. Eskolarteko Bertsolari Txapelketaren finalean, Kilometroak 2008ren ekitaldien baitan. Gipuzkoako Ikastolen elkarteak antolatuta, Irurako Ikastolaren laguntzarekin, eskualdeko bertsolariek emaitza oso onak lortu zituzten.

Alde batetik, Aratz Irazustabarrena alegiarrak, bertsopaparen sailean eta LH3 eta 4 mailetan txapela lortu zuen. Idatzizkoetan ere, Oihana Iguaran amasarrak DBHko bigarren zikloan aipamena lortu zuen. Bat batekoan, txikien mailan, 14 urte artekoetan, Goierri-Asteasu taldekoek lortu zuten txapela, tartean Haritz Mujika asteasuarrak.
Handien mailan, 14 eta 18 urte bitartekoetan Oihana Iguaranek parte hartzen zuen baina ez zuen saririk lortu. Txapela Ane Labaka lasartearrak eraman zuen eta bigarren Asier Azpiroz zubietarra izan zen.

KMk-08: SPINNING FESTA

2008-05-26T10:47:00.000-07:00

Kilometroak 08 egitasmoaren barruan antolatu dugun spinning festak honako helburuak ditu:
Spinning-a, puri-purian dagoen jarduera aitzakia hartuta kmk-08 egitasmoa bailaran ezagutaraztea.
Ekintza burutuko den tokiaren ezaugarri berezi eta erakargarriak aprobetxatuz, ez ohikoa den "argazkia" lortzea.
Gure hizkuntza, euskararen erabilera bultzatzea, spinning-a bezalako jarduera fisiko modernoetan.
Kmk-08 egitasmoko ekintza bat gehiago denez, Irurako Ikastolari ekonomikoki bultzadatxoa ematea.
Osasunean hainbesteko garrantzia duen jarduera fisikoaren ludikotasuna lantzea, gizartean ohitura osasungarriak bultzatzeko.
Ahalik eta jende gehienak Spinning Festan parte hartzea, kirolak berekin dakarren konpetitibitatea alboan utzi eta jardueraren alor ludikoarekin festa handi bat eginez.

Informazioa

Data: 2008ko ekainaren 28an
Lekua: Tolosako Zerkausian
Ordutegia: - Harrera eta informazio gunea: 15:30 - 21:00

- Motxila zerbitzua: 15:30 - 20:45 - Saioak (nahi adina aukera daitezke): - 1.saioa: 16:30 - 17:20 - 2.saioa: 17:30 - 18:20 - 3.saioa: 18:30 - 19:20 - 4.saioa: 19:30 - 20:20 - Zozketa: 20:45

Akreditazioa: Spinning festan izena eman duen guztiak, egunean bertan, dagokion saioa baino lehen (gehienez ordubete eta gutxienez hamar minutu) harrera mahaira joan beharko du, bertan, akreditazioa jasotzeko. Horretarako ezinbestekoa izango da nortasun agiria erakustea.
Motxila zerbitzua: Parte hartzaile guztiek, motxilak antolakuntzaren ardurapean uzteko aukera izango dute euren saioak dirauen bitartean, horretarako akreditazioa erakutsi eta izen abizenak eman beharko dituztelarik

Araudia
Parte hartzaileek hamasei urtetik gora izan behar dute.
Parte hartzaileek izena eman ahala beteko dira saio guztietako bizikletak. Azkeneko bizikletarako izen-ematea egiten denean, izen-ematea itxita geratuko da.
Izen emateak balioa izango badu, EUSKADIKO KUTXA-n norberari dagokion ordainketa egin behar da. Hiru egunen buruan ordainketarik egiten ez bada, izen ematea bertan behera geratuko da.
Egunean bertan, harrera eta informazio gunean izena eman ahalko da, beti ere, aurrez bizikleta guztiak betetzen ez badira.
Bizikletak ez dira zenbatuta egongo eta parte hartzaileek, eremura sartu ahala, libre dauden bizikletak aukeratzeko eskubidea izango dute. Saio bat baino gehiago egin behar dituenak, bizikleta bera erabiliko du saio guztietan.
Ez dugu ziurtatzen bizikleta guztiek pedal hibridoa izango dutenik. Edozein kasutan, debekatuta dago bizikleten pedalak aldatzea.
Ezinbestekoa da izerdia lehortzeko esku oihala eramatea.
Izena emateko ezinbestekoa da 16 urte izatea (edo 2008an ehar 16 betetzea).
Antolakuntzak ez du bere egingo parte hartzaileak bere buruan edo beste pertsona batzuenean eragin edo jasan ditzakeen lesioen ardura eta kalte ordainik.
Izena ematean, parte hartzaile orok onartu egingo ditu araudian datozen baldintza guztiak.
Izen ematea Ekainaren 23an itxiko da epea. Izena eman...

XIV ORDUKO IBILALDIA

2008-05-26T10:33:00.001-07:00

Maiatzaren 18a. Horixe da aurtengorako aukeratu dugun eguna. XIV Orduko Ibilaldia berriz ere hemen da, eta hartara begira lanean ari da Aralarko Adiskideak elkartea. Lau urtez behin egiten da ibilaldia, Tolosan abiatu eta aipatu denbora bueltan berriz ere bertara itzultzeko; Aralar mendigunera egiten da joan etorria.

Aurten Kilometroak Iruran egingo denez, ekitaldi horren laguntzaile izateko aukera ematen dizu Aralarko Adiskideak elkarteak izena ematerakoan 1 € gehiago jarriz.

Eta Kilometroak 08ko antolaketa-taldeko ordezkariak Aralarko Adiskideak elkarteari laguntzera joango dira maiatzaren 18an Aralarko San Migeleko postuan beraiek izango direlarik mendizaleetaz arduratuko direnak jatekoak eta edatekoak banatuz.

I. Ñañarri rallyesprinta

2008-05-14T12:17:00.001-07:00

Apalantza anaiak nagusitu ziren atzo 'I. Ñañarri rallyesprintan'

2008-04-27T12:10:00.000-07:00

Giro ezin hobea bizi izan zen atzo Txindokipean. Kotxezaleak gainera, hitzordu garrantzitsua zuten iragarrita atzorako, I. Ñañarri rallyesprinta antolatuta baitzegoen arratsalderako. Antolatzaileak jarritako ordurako, 3:30etarako, kotxe guztiak prest zeuden Alegiako irteera puntuan, Orendain aldeko krutzean, euren txanda noiz iritsiko zain. Minutuero kotxe bat atera zen Alegia, Orendain, Abaltzisketa eta Amezketa arteko hamar kilometro pasata egiteko prest. Gidari bakoitzak hiru manga egin behar zituen. Denbora hobena Gorka Apalantzak eta bere anaia Aitzolek egin zuten. Bigarren postua berriz, Joseba Zapirainentzat izan zen, Borja Aguado ondoan zuela, eta hirugarrenak, Santi Artetxe eta Sandra Fernandez izan ziren.

Hasiera batean, 53 gidarik izena eman bazuten ere, antolatzaileek aditzera eman zutenez 49 kotxe atera ziren lasterketan parte hartzea. Dirudienez, komisarioak erabakita bi kotxe gelditu ziren irten gabe. Horietatik 35 gidarik bukatu zuten froga.

Kilometroak 08 Iruran ospatzen dela eta, urtean zehar burutzen ari diren ekintzen artean Lehen Ñañarri rallyesprinta antolatzea ekin zioten, euren ikastola berriaren proiektuari bultzada berri bat emateko asmoz. Erronka handia zen eurentzat baina emaitzak ikusita merezi izan du. Pozik agertzen ziren behintzat atzo rallysprinta amaitu ostean. Zehaztu zutenez «dena primeran atera da, eguraldiatik hasita. Azpimarragarria oso giro polita bizi izan dela egun guztian zehar eta froga iraunduen bitartean ez dela arazorik sortu». Irurako ikastolakoek goizean goiz hasi ziren lanean ibilbidean inguruan eta euren lana bukatu ostean, komisarioen esku geratu zen frogaren martxa.
Pozik egoteko beste arrazoietako bat jendearen erantzuna dela azpimarratu zuten antolatzaileek. «3.000 lagun hurbilduko zirela espero genuen eta gure prebisioak bete egin dira. Gainera, ikusleen artean giro polita egon da eta hauek gozatzeko aukera izan dute». Izan ere, gidariak egindako adierazpenen arabera, «ibilbidea azkarra, polita eta egokia izan da». Beraz, euren kotxeak gustora gidatzen zituzten bitartean, espektakulo ikusgarria eskaini zuten eszenatoki paregabean.

Bukatzeko antolatzaileek esan zuten «Ñañarri rallyesprinta antolatzen den lehen aldia izateko, balantzea oso ona da eta dena ondo atera denez denak gustora gelditu gara». Beraz, beste erronka handia honetan ere Irurakoak: Bikain.

SAILKAPENA
1.-: Gorka Apalantza (Vilariño Motorsport): 16:28:9.
2.-: Joseba Zapirain (Lagun Artea): 17:21:0.
3.-: Santi Artetxe: 17:42:2.
4.-: Iñigo Alustiza (Lagun Artea) 17:50:8.
5.-: Joxe Labaka (Lagun Artea): 17:52:0.
6.-: Txema Uzkudun (Lagun Artea): 18:15:4.
7.-: Iñaki Alberdi (Lagun Artea): 18:25:0.
8.-: Luciano Arrabal (Lagun Artea): 18:26:6.
9.-: Xabier Alustiza (Lagun Artea): 18:28:1

10.-: Xabier Beloki (Urraki): 18:35:0.

Lehen Ñañarri rallyesprinta jokoan larunbatean

2008-04-24T13:53:00.000-07:00

Irurako ikastolak antolatzen duen Kilometroak 08ren alde, larunbat honetan 'Lehen Ñañarri rallyesprinta' burutuko da. Aurkezpenean, Irurako ikastolako Iñigo Iñurrita, KMK-08 batzordeko antolatzaileetako bat eta KMK-08ren koordinatzaileak diren Joxe Mendizabal eta Igor Elortza izan ziren, rallyesprintaren nondik norakoak azaltzeko, Sardara eskuderiako ordezkari Imanol Narbarte eta Gipuzkoako federazioko lehendakaria den Iñigo Cuesta ondoan zituztelarik.

Agerraldian azaldutakoaren arabera, Alegiatik Orendainera joateko bidegurutzean hasiko da 10 kilometro eta 350 metroko luzera duen ibilbidea. Orendainetik eta Abaltzisketatik pasatuko dira rallyesprintean parte hartuko duten 53 gidariak, eta hemen, Larrunarri edo Ñañarri eskuinaldera utzita, Amezketara jaitsiko dira, herrira iritsi baino lehen helmugaratzeko.

Larunbatean goizeko 10:00etatik 12:00etara egiaztapen administratiboak eta teknikoak egingo dira Alegiako herri eskolan. Arratsaldeko 14:15etik aurrera, autoei az-ken uneko ukituak egiteko eta gurpil egokiak ezartzeko, Tolosako Aldaba auzoko Lantier eta Panelfisa enpresen ingurura abiatuko dira. Arratsaldeko 15:30ean puntuan lehenengo autoari irteera emango zaio; ondoren, gainerakoak minutuko tartearekin aterako dira, burutuko diren hiru txandetako lehena hasteko.

Zapirain kotxe berria

Izena emateko epea oraindik itxi ez bada ere, Euskal Herriko piloturik onenak bertan izango direla iragarri zuten atzo. Gainera, esan zutenez, Joseba Zapirainek bere auto berria, Peugeot 206 WRC delakoa, estreinatuko du. Santi Artetxe-Sandra Fernandez-en Peugeot 307 WRCa ere bertan izango da. Xabi Lujua-Txiki Burgos-en Skoda Octavia WRCak ere ahaleginak egingo ditu helmugara lehena iristen. Parte-hartzaileen, artean Gorka eta Aitzol Apalantza anaia errezildarrek osaturiko bikotea ere nabarmentzekoa da, euren Subaru Impreza WRCarekin ahalik eta denbora onena egiten saiatuko diren. Bertan izango da baita Tony Evangelista bere Ford Scort WRCarekin. Esan behar da, era berean, I. Ñañarri Rallyesprint hau 'traseras' koparako puntuagarria izango dela.

Zazpi pilotu junior bertan izango dira; besteak beste, Ion Muñoz, Euskadiko Txapelketan lehena, bere Citroen Saxo-arekin; Ioritz Mendikute, Euskadiko Txapelketan bigarrena, bere Citroen AXarekin. Auto '0'ko gidaria, orain gutxira arte pilotu izandako Xabier Ezenarro orendaindarra izango da, bere kopilotu Joseba Tobarrekin batera.

KMK 08: I. Ñañarri Rallysprinta apirilaren 26an izango da.

2008-04-21T11:42:00.000-07:00

Kilometroak 2008 ekimenaren barruan, hilaren 26an, Amezketa eta Alegi lotuko dituen Lehenengo Ñañarri Rally Sprinta egingo da, Sardara eskuderiak lagunduta. Euskal Herriko Rally Sprinten zirkuiturako baliagarria izango da proba eta punta puntako pilotuek hartuko dute parte.

Hamar bat kilometro izango dituen ibilbidea, Alegin hasiko da eta aldapan gora Orendain eta Abaltzisketa zeharkatu ondoren Amezketan bukatuko da. Antolatzaile lanetan dabiltzan KMK 08ko ordezkariekin eta Sardara eskuderiako kideekin izan gara.

ENTZUN HEMEN
<< Ñañarri RallySprinta

Bigarren eskuko azokak erantzun bikaina

2008-04-14T12:38:00.000-07:00

Bigarren eskuko azoka antolatu zuten Kilometroak 08ko garbiketa eta ingurugiro batzordekoek larunbat goizean Triangulo plazan. Ikastola ezberdinetan bildutako materiala jarri zuten mahaietan salgai. Jende ugari gerturatu zen bertara, bai ikustera, bai eta erostera ere. Eta bide batez, noski, ekimen honekin bat egitera.

Bigarren eskuko azoka antolatu du Kilometroak 2008k larunbaterako

2008-04-10T13:19:00.000-07:00

Garbiketa eta Ingurugiro Batzordeak bultzatu du egitasmoa eta Tolosako Triangulo plazan egingo dute.

Kilometroak 2008k bigarren eskuko azoka antolatu du larunbat honetarako. Tolosako Triangulo plazan egingo dute, 09:30ean hasi eta 13:30ak arte. Garbiketa eta Ingurugiro Batzordetik sortutako egitasmoa izan da. Nerea Bidaurreta Batzordeko kideak azaltzen duenez, «antolakuntzatik esan ziguten Batzorde guztiei ekitaldiren bat antolatzeko ideia emateko. Guri iruditu zitzaigun oso interesgarria, bigarren eskuko produktuei buelta ematea, eta hortik sortu zen ideia».

Izan ere, hezkuntzaren aldetik ere aukera ona ikusten dute, Bidaurretak dioenez: «Azoka hau egiterakoan ikasleei erakutsi diezaiokegu bigarren eskuko produktuei erabilera bat eman daitekeela. Nahiz eta beraiek ez erabili egon daitekeela norbait interesatzen zaiona hori erabiltzea».

Hainbat postu egongo dira. Batzuk partikularrak izango dira eta bestetik eskualdeko ikastoletatik eta Asteasuko Pello Errota eskolatik bildutako materiala izango da. Ikastetxeetara materiala eramateko azken eguna etzi izango da. Postua jartzen duten partikularrek kuota bat ordaindu beharko diote antolakuntzari. Bestalde, ikastetxe bakoitzeko materialarekin postu bana jarriko da. Prezioak materiala utzi duten ikasleek jarriko dituzte. Hortik ateratzen den dirua Kilometroak 2008rako izango da. Saltzen ez den materiala Kilometroak 2008rentzako geldituko da eta ekitaldi nagusiaren egunean jarriko den tonbolarako utziko dute ziurrrena. Artelatz enpresatik zein Tolosako Udaletik laguntza jaso dute bigarren eskuko azoka antolatzeko.

Rallysprinterako jende bila

Kilometroak 2008ren baitan, hurrengo ekitaldia hilaren 26an egingo da, Ñañarri-Irura I. Rallysprinta, hain zuzen. Antolakuntza aldetik ekitaldi handi izango da eta Kilometroak 2008tik azaldu dutenez, boluntarioak behar dituzte egun horretarako. Izena eman nahi dutenek Irurako Ikastolan bertan edo www.kilometroak.net helbidean egin dezakete.

Leidor gainezka izan zen KMK-08ren aldeko ikuskizunean

2008-03-10T13:49:00.000-07:00

Pirritx eta Porrotx pailazoek 'Eskerrik asko' lana eskaini zuten

Tolosako Leidor antzokia gainezka izan zen atzo arratsaldean, Pirritx eta Porrotx pailazoek eskainitako ikuskizunean. Ehunka haur bildu ziren Iruran burutuko den Kilometroak-08ko antolatzaileek prestaturiko hitzordu honetan. Bertan Eskerrik asko ikuskizuna ikusi ahal izan zuten bi saiotan; bata, arratsaldeko 5:00etan eta bestea, 7:00etan. Bi emanaldien aurretik, garaiz, hurbildu zen jendea sarrerako atera.

Antolatzaileen hitzetan, jendetsua eta ezustekoz betea izan zen emanaldia. Aurreko astean jada, sarrerak agortu ziren eta, ondorioz, bat baino gehiago geratuko zela uste dute antolatzaileek pailazo hauen emanaldia ikusteko aukerarik gabe.

Irurako Ikastolako haurrek ere ekitaldian parte hartzeko aukera paregabea izan zuten eta, bide batez, bertaratu ziren guztiek udaberriko arropa berria ikusi ahal izan zuten.

PIRRITX ETA PORROTX IRURAKO IKASTOLAN

2008-03-05T13:56:00.001-08:00

Pirritx eta Porrotxen 'Eskerrik asko' emanaldia Leidor aretoan

2008-03-03T12:36:00.000-08:00

Aurkezpena eraikitzen ari diren Irurako Ikastolaren eraikin berrian egin dute

KMK-08 egitasmoaren barruan gaur, martxoaren 3an, Irurako ikastolako eraikin berrian prentsaurrekoa izan da. Bertan Pirritx eta Porrotx pailazoaekin batera KMK-08ko koordinatzailea den Joxe Mendizabal eta lehendakaria den Sorkunde Irazu ere izan dira. Hauekin batera ikastolako zenbait ikasle KMK-08ko udaberriko erropekin ere parte hartu dute. 11:00etan hasi den prentsaurreko honetan Joxe Mendizabalek prentsaurrekoa bertan egitearen arrazoiak azaldu ditu.

Ikastola berria eraikitzen ari gara eta honek erronka handia suposatzen du. Ikastola txikia denez ez dugu baliabiderik ekonomikoki hau guztia aurrera ateratzeko. Hau dela eta, urte osoan zehar ekintza desberdinak antolatu ditugu. Tolosako inauterietan burututako ekintzekin batera, datorren larunbatean, martxoaren 8an, Tolosako Leidor antzokian Pirritx eta Porrotx izango ditugu. Bertan “Eskerrik asko” ikuskizuna ikusi ahal izango dugu bi saiotan; bata, 5etan eta bestea, 7etan. Zehazki minbizia duten haurrengan oinarrituta dagoen ekitaldia da. Aspanovas elkartearekin elkarlanean eginiko lanaren emaitza da bertan ikusiko duguna.

Sorkunde Irazuk Pirritx eta Porrotxei eskerrak eman dizkie hasieratik KMK-08rekin elkarlanean daudelako eta aldi berean, Pirritx eta Porrotxek eskerrak emanez, ikastolen lanarekin bat egin dute, EUSKARA, alaitasuna eta baloreen transmisioa azpimarratuz.

Etorri diren guztiei eskerrak emanez eta herria eta eraikin berriari bultzada bat emanez amaitu da prentsaurrekoa.

Guztiek batera, ikasleak barne, “AUPA IRURA, GORA ERAIKITZEN, KATXIPORRETA URDAIAZPIKO KROKETA, GORA KILOMETROAK, GORA IKASTOLA ETA AUPA GURE ERAIKIN BERRIA!” oihukatuz.

KMK-08 KOMUNIKAZIO BATZORDEA

PIRRITX ETA PORROTX MARTXOAREN 8AN TOLOSAKO LEIDORREN

2008-03-03T11:56:00.000-08:00

Datorren larunbatean, martxoaren 8an, Tolosako Leidor antzokian Pirritx eta Porrotx izango ditugu. Bertan “Eskerrik asko” ikuskizuna ikusi ahal izango dugu bi saiotan; bata, 5etan eta bestea, 7etan. Zehazki minbizia duten haurrengan oinarrituta dagoen ekitaldia da. Aspanovas elkartearekin elkarlanean eginiko lanaren emaitza da bertan ikusiko duguna.

300 lagun inguru elkartu ziren KMK 2008ren kantu afarian

2008-02-27T13:22:00.000-08:00

Anoetako Antolatzaileak «oso gustura» ekitaldiaren nondik norakoekin; herriari eskerrak emateko balio izan du kantu afariak

Kilometroak 2008ko Anoetako Batzordeak eta Ikuskizun Batzordeak bultzatuta, larunbat gauean kantu afaria egin zuten Anoetako frontoian. Antolatzaileak «oso gustura» agertu dira ekitaldia nola izan zen ikusita. «Janaria oso gozoa zegoen eta giroa ere oso ona izan zen. Arrakastatsua izan dela esan daiteke».
Izan ere, 300 lagun inguruk parte hartu zuten. «Batenbat joan gabe gelditu zen, baina kopuru horiekin zerrenda itxi behar izan genuen, bestela esan baikenuen sukaldeko lana ondo bete». Hain zuzen, antolatzaileek Kuku elkartean sukaldari lanetan aritu zirenen jarduna goraipatu dute. «Oso ondo prestatuta zegoen eta hainbeste jenderentzat afaria egitea ez da batere erraza». Afaria eta gero Antton Iztueta arduratu zen elkartu zirenak kantatzen jartzeaz eta bukaeran Unsain Anaiek erromeri giroa jarri zuten.

Eskerrak emanez

Afarian zehar, Kilometroak 2008ren antolatzaileek Anoetako herriari eskerrak emateko baliatu zuten, bai jaialdia antolatzeagatik bai orain arteko beste ekintzetan zein etorkizunean etorriko direnengatik. Horrela, Anoetako Ikastolari, bertako guraso batzordeari, Gaztetxeari, Kuku elkarteari eta Udalari eman zizkioten eskerrak. Bestalde, afaria girotu zuten Antton Iztueta zein Unsain Anaiek ere jaso zituzten esker onak.
Horrez gain, Kilometroak 2008ren inguruko hurrengo ekitaldien berri eman zuten. Hala, martxoaren 8an Pirritx eta Porrotx pailazoen emanaldia izango da eta apirilaren 26an Ñañarri-Irura Rally Sprint antolatuko dute. Azken ekitaldi honetarako boluntarioak beharko dituztela azaldu dute antolatzaileek.

Kantu afaria antololatu dute Anoetan larunbaterako

2008-02-25T09:16:00.000-08:00

Kilometroak 2008ren egitasmoan kokatzen da ekitaldia

Kilometroak 2008ren Anoetako Batzordeak kantu afaria antolatu du larunbat honetarako, hilak 23, Anoetako frontoian. Batzordeko kide eta Irurako Ikastolako irakasle diren Ainhoa Artolak eta Maialen Mujikak azaldu dutenez, "herriari laguntza eskatzeaz gain, zerbait egitea nahi genuen. Ikuskizun Batzordearekin batera pentsatu genuen afaria egitea".
Afaria hilaren 23an izango da eta sarrerak erosteko azken eguna hilaren 21a izango da. Txartelak Anoetako Buztina, Itzuli eta Arkupe tabernetan eta Anoetako eta Irurako ikastoletan daude salgai. Helduak 15 euro eta haurrek 8 euro ordaindu behar dute. Haurren txartelak bi ikastoletan soilik daude salgai. Egitarauari dagokionez, afaria bukatzearekin batera KMK-08koen aldetik herriari eskerrak emango zaizkio eta zirkuituaren nondik norakoak azalduko dira Anoetari dagokionez. Ondoren kantu saioa egingo da eta bukatzeko erromeria Unsain anaiekin.

KMK-08 KANTU AFARIA ANOETAN

2008-02-18T11:01:00.000-08:00

Non: Anoetako frontoian

Noiz: Otsailaren 23an

Egitaraua
- 20:00etan frontoian elkartuko gara.
- 21:00tan afariari hasiera eman.
- Postrearekin batera KMK-08en aldetik herriari eskerrak eta zirkuituaren nondik norakoak.
- Ondoren, kantu saioa.
- Ekitaldia borobiltzeko, Unsain anaiekin erromeria.
Txartelak salgai

- Anoetako Buztina, Itzuli eta Arkupe tabernetan.
- Anoetako eta Irurako ikastoletan.
- Helduak 15€ eta umeak 8€.

Hotza egingo balu berogailua piztuko genuke.

KMK-08KO EKIMENAK INAUTERIETAN

2008-02-18T10:36:00.000-08:00

Aurtengo inauteritan hiru ekimen eraman ditu aurrera KMK-08ko taldeak

Batetik taberna ireki dugu Tolosako Alde Zaharrean. Taberna kalderero egunean ireki zen eta inauteritan ere egunero egon da zabalik goizeko 10:30etatik aurrera. Jende asko ibili da tabernan lanean, guraso, irakasle, batzordeetako kideak eta lanerako prest agertu diren eskualdeko hainbat lagun.

Jendearen erantzuna oso ona izan da. Oso ondo egin da lan eta zoriondu gaituzte itxurazko taberna prestatu dugulako.

Bestetik tonbola zabaldu genuen igandean Foruen Etorbidean. Boleto asko saldu ziren eta opari dezente banatu ere.

Igandean, otsailaren 3an, egon zen zabalik goizean eta arratsaldean. 2.500 opari zozketatu zituzten eta 3 txarteletatik 1 sariduna izan zen. Bidaiak, asteburuko egonaldiak, afariak, bizikleta, apaingarriak, jostailuak, edergintzako produktuak eta beste opari asko banatu genituen.

Azkenik “Auto zozketa” ekimena ere abian jarri zen. Igande, astelehen eta asteartean goizeko 10:00etan hasi eta gaueko 10:00etara bitartean autoaren zozketarako boleto asko saldu ziren San Franzisko kalean.

Balorazio orokorra oso ona da. Jendeak lan asko egin du eta onura eta etekin handia atera diegu hiru ekintza hauei. Bestalde KMK-08ren presentzia aurtengo inauterietan begibistakoa izan da.

INAUTERIAK IRURAKO IKASTOLAN

2008-02-07T10:01:00.000-08:00

Eguraldi ona egin zuen eta dena oso ondo atera zitzaigun.Guraso asko hurbildu ziren gure emanaldia ikustera eta benetan dena bikain atera zen.
Argazki hauetan ikus dezakezue nolakoa izan zen ostegun gizeneko gure jaia.

INAUTERIETAN ERE, IRURAKO IKASTOLAREN ALDEKO EKIMENAK.

2008-02-01T09:16:00.000-08:00

Inauterien hasiera iragarriko duen suziria gaur jaurtiko dute Tolosan. Gogotsu daude asko, eta lan eta lan beste hainbat. Aurtengo Kilometroak jaia antolatzea dagokio Irurako Ikastolari, eta jai hauei ere probetxua atera nahi die dirua batzeko. Tonbola jarriko dute, egun osoan zabalik izando den taberna zabalduko dute eta auto zozketarako txartelak salgai jarriko dituzte.

Gaur abiatuko dira inauteriak Tolosan eta guztia prest dago jada. Kale bazterrak apainduta, tabernak jan eta edariz lepo... Aurtengo Kilometroak jaiaren ardura duen Irurako Ikastola ere buru-belarri ari da lanean, datozen egunetan leku handia izango baitute jaietan.

Tolosan atzo egindako agerraldian aditzera eman zutenez, urriaren 5ean egingo duten jairako behar duten dirua lortze aldera, hainbat ekimen antolatzea otu zitzaien inauterien harira, eta jendeak emandako laguntzari esker guztiak gauzatu ahal izango dituzte.

Orotara, hiru dira datozen egunetan martxan jarriko dituzten ekimenak. Batetik, inauterietan hain ohiko den tonbola. Baina Foruen etorbidean jarriko dutena berezia izango da inondik ere. Aukeran izango diren sariak Tolosa, Irura eta Anoetako merkatariek eman dizkiete. Orotara, 2.500 sari batzea lortu dute eta 9.000 bat txartel saltzeko asmoa dute. Beraz, nabarmendu zutenez, hiru txarteletik bat sariduna izango da.

Mota guztietako opariak jaso dituzte zozketan emateko. Badira handiak, Teneriferako bi hegazkin txartel, musika entzuteko tresna, bizikleta...; badira xumeagoak ere. «Denetik dago, eta denak oso sari politak dira», adierazi zuten.

Tonbolan ez ezik, izango da Gipuzkoako ikastolen jaiari laguntzeko beste modurik ere. Ikastolako arduradurek taberna bat jarri dute eta inauteriak irauten duten bitartean zabalik izango da, jan edota edan nahi duten guztientzat. Arostegieta kalean dago kokatua, lehen Guria taberna zen lokalean bertan. «Guk `Eraikitzen' izena jarri diogu», jakinarazi zuen Ikastolako zuzendari Iosune Aiestaranek. Horixe da hain zuzen aurtengo Kilometroak 2008ren leloa; izan ere, jasoko duten diruarekin «eraikitzen» ari diren eraikin berria ordainduko dute.

Irurako Ikastolaren aldeko hirugarren ekimen bat ere bada. Inauterietan jarriko dute abian auto zozketa, eta Soldadu kalean izango dira txartelak salgai. Hiru egunetan, igandean, astelehenean eta asteartean, izango da horiek eskuratzeko aukera, goiz eta arratsaldez.

Aiestaranek ekimenok aurrera egin dezaten jaso duten laguntza guztia eskertu nahi izan zuen: «Eskerrak Tolosako Udalari, eman digun laguntza handiagatik; eskerrak taberna utzi digun tabernariari; eta eskerrak tonbola osatzen lagundu diguten merkatarien elkarteei, Alde Zaharrekoei eta Igarondokoei, eta elkarte hauetan ez badaude ere, gurekiko begirune handia izan duten Tolosako, Irurako eta Anoetako dendari guztiei». «Zalaparta honen arrazoi bakarra gure ikastola berria da. Eraikuntza lanak martxa onean doaz eta horregatik oso pozik gaude; lan asko egitea dagokigu, baina oso gustura ari gara», ohartarazi zuen Aiestaranek.

Irurako Ikastolako ikasleak Behobiakoen pare ibili dira lasterka

2008-01-22T13:49:00.001-08:00

Behobia txiki baten antzera, korrikalari gaztetxoz bete ziren igandean Tolosako kaleak. Ero Etxe elkarteak antolatutako lasterketa herrikoi honetan 9 eta 14 urte bitarteko 600 gaztetxo inguruk hartu zute parte. Aurtengoa krosaren 21. edizioa izan zen. Hala, antolatzaileak «gustura» agertu ziren aurtengo probarekin.
Irurako ikastolako ikasleak korrika

Lasterkariak sei talde edo mailatan banatu zituzten, hauen arabera, metro gehiago edo gutxiago zeharkatu zituztelarik. Parte-hartzaile txikienak benjaminak izan ziren, eta helduenak, infantilak. Mailaketa honen arabera, eta ondorengoak izan ziren garaile: Maddi Garikano, Josu Ibarbia, Jone Gomez, Odei Arrieta, Ainhoa Garikano eta Odei Martinez. Hauei, proba amaitu ondoren, antolatzaileek, garaikurrak banatu zizkieten. Hala ere, irabazleentzat ezezik, gainontzeko parte-hartzaileentzat ere izan ziren sariak, hauen artean hainbat opari banatu baitzituzten.

Aipatu bezala, 21 urte bete ditu aurten Ero Etxe elkarteak antolatutako krosak, eta galdu ezinezko ohitura bilakatu da jada korrikalari txikienentzat. Ohitura jarraituz, urteko hirugarren igandean ospatzen da, aurten, San Sebastian Egunarekin bat egin duelarik.

Lasterkariak San Frantzisko elizaren paretik irteten dira, eta toki berean ematen diote amaiera. Tolosako nahiz eskualdeko beste herrietako haurrek hartzen dute parte, nahiz eta eskualdeko hiriburuko elkarte batek antolatu.

Haurren garapen pertsonala zaintzeko eta bultzatzeko asmoz sortu zen duela 21 urte Ero-etxeko krosa. Etenik gabe, hainbeste urtetan jokatu ondoren, indar gehien duen kirol festa errotuenetako bat Tolosan. Festa handi bat bailitzan, ikaskide, lagun nahiz familiako hainbat kide gerturatzen dira korrikalari txikiak animatzera.

Kilometroak-08 ko Denda ibiltaria

2008-01-11T15:56:00.000-08:00

KILOMETROAK-08 KO DENDA IBILTARIA MUTRIKUN

Denda eta biltegiko salmentez gain, urte osoan Gipuzkoako herri eta auzoetan izaten gara talde desberdinak eta arropa-postuak ezartzen ditugu. Festa, azoka berezi edo jai-egun esanguratsuak diren herrietara joan ohi gara materiala saltzera.Hurrengo argazkietan Mutrikura egin genuen irteera ikusi dezakegu.

URTARRILA ETA OTSAILEKO EGUTEGIA

Urtarrilak 13
- Lazkaoko Astotxo egunean.
- Hernaniko Sagardo Egunean, egun erdiz.

Urtarrilak 17
- Getariko San Antón Jaietan, egun osoan.

Urtarrilak 19
- Olaberriako Carrefour merkatalgunean, 11:00tik 19:30ra.

Urtarrilak 20
- Azpeitiako San Sebastian egunean, egun osoan.
- Donostiako San Sebastian egunean, egun osoan.

Urtarrilak 26
- Lizartzako inauterietan, egun osoan.
- Olaberriako Carrefour merkatalgunean, 11:00tik 19:30ra.

Otsailak 2
- Idiazabalgo herriko jaietan, 11:00tik 18:30era.
- Olaberriako Carrefour merkatalgunean, 11:00tik 19:30ra.

Otsailak 3
- Idiazabalgo herriko jaietan, 11:00tik 18:30era.
- Tolosako Inauterietan, 11:00tik 18:30era.

Otsailak 9
- Olaberriako Carrefour merkatalgunean, 11:00tik 19:30ra.

Otsailak 16
- Olaberriako Carrefour merkatalgunean, 11:00tik 19:30ra.
- Tolosako Triangulu Plazan Zuhaitz egunean, 9:00tik 14:30era.

Irurako ikastola: urtero bezala abenduaren 24an abesten ibili ginen Irurako kaleetatik.

2008-01-08T14:08:00.001-08:00

ZORIONAK ETA URTE BERRI ON! IRURAKO IKASTOLA

2007-12-18T15:36:00.001-08:00

Gabonetako abestiak ikasteko eta abesteko !!!!!!

2007-12-18T14:49:00.000-08:00

OLENTZERO

Horra! Horra!

Gure Olentzero!

Pipa hortzetan duela

eserita dago

kapoiak ere baditu arraultzatxuakin

bihar meriendatzeko

botila ardoakin.

Olentzero buru haundia

entendimentuz jantzia

bart arratsean

edan omen du

bost arroako zahagia.

Hoi urde tripa-handia

tralalalala.

HATOR HATOR

Hator, hator mutil etxera

gaztaina ximelak jatera,

Gabon gaua ospatutzeko

aitaren eta amaren ondoan.

Ikusiko duk aita barrezka

amaren poz ta atseginez.

Eragiok, mutil,

aurreko danbolin horri.

Gaztainak erre artean

gaztainak erre artean,

txipli txapla, pum!

Gabon gaua pozik igaro daigun.

HORRA MARI DOMINGI

Horra Mari Domingi

begira horri

gurekin nahi duela

Belena etorri.

Gurekin nahi baduzu

Belena etorri

atera beharko duzu

gona zahar hori.

Hatoz, hatoz, zure bila nenbilen ni!

Hatoz, hatoz zure bila nenbilen ni!

Hatoz goazen ta gurtu dezagun

Belenen jaio den haurtxo eder hori

Haurtxo eder hori.

Irurako ikasleek Agenda 21ekin bat egin zuten

2007-12-11T11:22:00.000-08:00

Aduna, Berastegi eta Irurako ikastolako ikasleek euren herrietako udaletxera hurbildu ziren atzo Agenda 21eko proiektua sinatzeko egindako ekitaldira.

2007-08 ikasturte honetan, Tolosaldeako 12 herritako ikastetxeak ari dira Eskolako Agenda 21 proiektua lantzen: Aduna, Anoeta, Berastegi, Berrobi, Bidegoian, Ibarra, Ikaztegieta, Irura, Lizar-tza, Tolosa, Villabona eta Zizurkil. Denera 20 ikastetxe izango dira proiektua lantzen arituko direnak. Gehienek Lehen Hezkun- tzako ikasleak bakarrik badituzte ere, badira gazteekin lanean ari direnak ere: 5 ikastetxek DBHko ikasleak dituzte eta beste bik lanbide hezkuntzakoak.

Irurakoak izan ziren sinatzen lehenak eta atzo goizean udaletxean izandako Eskolako Agenda 21eko hitzarmenaren sinadura parte hartu zuren. Hirugarren, laugarren, bosgarren eta seigarren mailako haurrak gerturatu ziren, irakasle eta ikastolako zuzendariarekin batera. Udale-txean Marimi Ugalde, alkatea eta Zuloaga Txiki aterpeko Ima Perez. Sinadura emateaz gain, ikastolako ikasle batek hartutako konpromezuaren dokumentua irakurri zuen.

Irurako ikastola argazkietan

2007-12-10T13:38:00.000-08:00

Lanean buru belarri, denon ametsa egia bihurtzen

2007-12-03T12:27:00.000-08:00

Irurako herritarrak ahal duten guztia egiten ari dira ikastola berriaren alde dirua lortzeko. Orain, Kilometroak 08ko arropa saltzea da eginbehar nagusia

Kilometroak 08ko arropa estrenaitzeko aukera paregabea dago Irurako ikastolakoek dendak zabaldu dituztenez geroztik, herrian bertan eta Tolosako Kale Nagusian. Datorren urteko Kilometroak Leidorren egindako aurkezpen jaialdian Irura eta Anoetako ikastolako ikasle eta ikasle ohiek, Ibarrako Uzturpe eta Tolosako Laskorain ikastolakoekin eta Inmakulada ikastetxoekin batera erakutsi zuten datozen hilabetetan janzteko prakak, sudaderak, nikiak, gonak eta pinak, metxeroak, poltsak eta osagarriak ere salduko dituzte.

«Etxeko guztiak janzteko aukera izango dugu, hasi txikietatik eta nagusiak arte» esan zuen Sorkunde Irazuk, Irurako ikaslatolako lehendakariak. Gainera, «arropa batzutan logotipoaren marrazkia handia da baina, beste askotan ez da ikusi ere egingo, toki diskreto batean joango dira eta ez da antzeman ere egingo» Irazuren esanetan. Beti ere, aukeraketa egiterakoan arropa modernoa eta erosoa eskaintzea izan dute kontuan Irurako ikastolakoek. Arroparekin lortzen duten dirua euren ametsa lortzeko erabiliko dute: Ikastola berriko eraikuntza ordaintzea, eta dagoeneko badakite 1.800.000 euroko aurrekontuari egin behar diotela aurre, nahiz eta, horietako 600.000 Irurako Udalak ordainduko dituen.

Ama, amona, bolondresa

Amets hori egi bihurtzeko ahalegin handia eginez, ikastolako zuzendaritzarekin batera gurasoak ari dira buru belarri. Helburua garbi dute: ahal den eta diru gehiago lortzea arroparen salmentatik. Horregatik, egunero egunero, goizez edo arratsaldez, txandatan banatuta, Iruran utzi dieten lokal batean elkartzen dira gurasoak, batez ere amak: horien artean, Candi, Ana, Marijo, Idoia, Maribi, Isabel, Ane, Nuria eta Milagros. Hauek zioten bezala, «denak utzi, etxeko lanak eta bestelakoak eta egunero ahal dugun bitartean hemen aritzen gara arropa prestatzen: etiketak jarri, sailkatzen, eta beslakoak egiten».

Baina ez bakarrik gaur egungo ikasleen amak, ikasle oihen amak ere ondoan dituzte laguntzeko prest eta herritar bolondresak edo inguruko herrietatik etorritakoak. Gainera, horietako batzuk, dagoeneko amonak ere badira eta bilobak ikastolan noiz hasiko diren bitartean izena eman dute ahal dutena egiteko prest. Esaterako, Maribi. bere hiru umek ikastolan ikasi zuten eta horiena rtean bat bertako irakaslea da gaur egun. Candik ere ikastolako hasierako urte gogorrak bizi eta gero laguntzeko prest dago eta lanean ari diren bitartean orduko kontuan gogoratzen dituzte. Roak esaterako gogoan du «100 pezeta ordaintzen genuen kuota, duela 30 urte, ikastola martxan jarri zenean. Festetan kantina jartzen genuen eta ahal zuenek lagundu egiten ziguten ahal zutenarekin». Ana Marik ere ezin du ahaztu «ixteko arriskuan egon zen ikastola, ume falta zela eta, baina aurrera egin genuen eta begira nora iritsi garen».

Amak esaterakoan, gehienak emakuemak direlako, baina esaten zutenez «aitak dendak txukuntzeko lagundu dute, apalak jartzen edo bestelako lanak egiten».

Beraz, denon artean, pixkanaka pixkanaka euren helburua lortzeko aurrera doaz.

Azoka, jaiak, herriz herri

Dendan, saltzen egoteko ere, 'dendari' bolodresak daude eta hauek ere astez, arratsaldero egoten dira. Irurakoa astez arratsaldero bi orduz egongo da zabalik. Iruran, astez, asteartetan arratsaldeko 5etatik 8etara eta larunbatetan, goizeko 11etatik 13era. Tolosako berriz, astez 5etatik 8etara eta asteburuetan, goizez 9etatik 13etara eta 5etatik 8etara. Baina, dendatik aparte, Kilometroak 08ko arropa salgai jarriko dute. Horretarako lantaldeak antolatu dituzte guraso, herritar eta bolondresekin eta hauek, herriz herri, azoka, jaiak eta bestelako hitzor- duetan egongo dira.

IKASTOLAREN HISTORIA

2007-11-29T13:30:00.000-08:00

Han-hemenka ate joka aritu, egoitza eskuratu eta 1977.urteko irailaren 1ean JAIO zen Irurako Ikastola.

Nahiz Irurako ikastolak 1977ko irailean ateak zabaldu, atzean bazegoen kezka nagusi bat: herrian euskara galtzen ari zela.

Hori horrela izanik, Gazte Alaiak elkartearen inguruan herriko hainbat gurasok eta gaztek, gaiari heldu zioten.

Aldez aurretik lokalak bilatu zituzten, finantziazio iturriak ere bai eta erabat euskarazko heziketa eta, gainera, pedagogikoki berritzailea izatea zen helburua.

Egoera ez zen samurra, urduritasunak lekua zuen, baina talde hartako kideei ilusiorik ez zitzaien falta, egungoei falta ez zaien bezalaxe, nahiz eta honek guztiak berekin lana eta lana dakarrela jakin, bai orduan eta bai gaur.

Apaizetxeko lokalean abiatu ziren. Handik urte gutxira, 1981ean, Hezkuntza
Sailaren eskutik titulartasuna lortu eta ordura arte lortu gabeko diru laguntzak jasotzen hasi zen Ikastola. 1983an Ikastola izaten jarraitzeko erabakia hartu zen bailarako ikastolekin batera.

1985ean, egungo egoitzara pasatu ziren, ikastetxea eskola publikoarekin batera konpartitzen zutela.
1986an eskola publikoa desagertu egin zen eta HH osoa gela batean eskaintzen zuen Ikastola zen Irurakoa.

Gerora, Irurako Ikastolako haurrek Anoetako Herri
Ikastolan burutzen zituzten ikasketak eta Tolosan ondorengoak.
Begi-bistakoa da bi ikastolen arteko harreman estua: administraria, proiektu pedagogiko berritzaile guztiak, ingeleseko klaseak,heziketa bereziko irakaslearen laguntza, jangela, eta abar, eta abar.

Ezin ahaztu Irurako Ikastolak Anoetako Ikastolarengandik jaso izan duen babesa.
Ildo horretatik, 1990-1995 urteetan Irurako eta Anoetako gurasoek kontseilu errektore bakarra izatera iritsi ziren.
1994an bigarren gela zabaldu zen ikastolan: 2-3 urtekoak gela batean eta 4-5 urtekoak bestean. Beraz, bi langile zeuden bertan.

1996-1997an hirugarren gela zabaldu zen, hirugarren langilea hasi zen, beraz.
Herri hazkundea begi-bistakoa zenez, bi Ikastolek eta bi Udalek (Irurakoak eta Anoetakoak) arazoari heldu zioten, herri bakoitzak bere identitatea mantentzea ezinbestekoa zela garbi zuten aipatutako lau taldek eta etapa berri bati ekin zitzaion.

2003-2004 ikasturtean LHko 1 eta 2 gelak zabaldu ziren, berriro ere apaizetxean, horrela urtez urte LH osoa osatu arte. Egun, esan daiteke 2 urtetik hasi eta 12 urte arteko hezkuntza eskaintzen duela Irurako Ikastolak.

Bitartean, forma juridiko berria eman zitzaion: kooperatiba integrala. Aipatu kooperatiba gurasoek, irakasleek, Udalak eta ez-ohiko bazkideek osatzen dute, portzentaia jakin batzuetan betiere. Egun, 140 ikasle ditu, 106 familia eta 15 langile.

Gainera, eskola orduz kanpo kirol osagarriak ere antolatzen ditu. Ikastolaren proiektu pedagogikoak elkarlanari eta elkarrekin bizitzeari garrantzia ematen die. Hori horrela izanik, guraso eskola, euskarazko klaseak, bizikidetza plana, agenda 21
antolatze-lanetan parte hartzen du, besteak beste.

Ikastola berriaren eraikuntza 2007-12-20

2007-11-28T12:21:00.000-08:00

«Kilometroak 2008 martxan dago»

2007-11-26T13:00:00.000-08:00

«Kilometroak 2008 antolatzea erronka handia da»

Joxe Mendizabal (Ibarra, 1967) ari da Iruran egingo diren Kilometroak 2008ko koordinatzaile lanetan.

Zein izango da zure zeregina?

Batzordeak osatuta daude dagoeneko. Batzorde batean hartzen diren erabakiak besteetan dute eragina eta hori guztia koordinatzea da nire zeregina.

Nolatan zaude koordinatzaile lanetan?

Ikuskizunetako batzordean sartu nintzen irailaren hasiera aldera eta horitk gutxira koordinatzaile postua eskaini zidaten. Ni izatez musikaria naiz eta lan berria izango da, baina lehen ere saltsa askotan ibili naiz, tartean Ikastoletako jaietan eta hainbat ikuskizunetan ere.

Urtebete hau, beraz, bizia izango da.

Bai, hala izango da, baina horrek beldurrik ez dit ematen. Are gehiago, gustatu egiten zait. Badakit erronka handia dela. Kontuan hartu behar da Irura herri txikia dela eta denok garela beharrezkoak.

Nola doaz prestaketak?

Batzordeak martxan daude, bakoitza bere bilerak eginez. Bi ekitaldi laster egingo ditugu, baina beste hainbat gauza ditugu eskuartean eta horiek prestatzen ari gara. Mezua da dagoeneko martxan dagoela Kilometroak 2008.
Irurarrek badute eskarmentua boluntarioki lana egiten.
Atzo bertan salmenta batzordeko bilera irekia egin zen eta Ikastolen Elkartetik etortzen den koordinatzailea harrituta zegoen agertutako jende kopuruarekin. Baina, boluntario horien guztien lana erregulatu egin beharra dago.

Kilometroak 2008ko ARROPA DENDA IREKI DUTE

2007-11-26T12:49:00.000-08:00

Irurako Kilometroak 2008ren aurkezpen ofizialaren ondoren ireki dute egitasmoaren arropa denda. Tolosako Kale Nagusian dago eta era guztietako arropa eta osagaiak aurkitu daitezke bertan.

Irekita dago Kilometroak 2008ko arropa denda. Tolosan dago, Kale Nagusiaren 15. zenbakian, Kutxak utzitako lokal batean. Asteburuan aurkezpen ofiziala egin ondoren, nahi duenak eros ditzake Irurako Kilometroen arropa.Muntai batzordekoek lan handia egin ondoren, lokala txukundu eta beste edozein dendaren itxura du Kilometroen dendak.

Aukera ugari

Itxura ez ezik, saltzen dena ere beste denda batean topatu daitekeena da. Beraz, logoa duen ohiko kamisetaz eta sudaderaz gain, hainbat arropa eta osagai eros daiteke. Oinetakoak eta barruko arropa ez den beste edozer.

Denda astelehenetik larunbatera irekita dago, 17:00etatik 20:00etara. Larunbatetan ere goizetan irekita dago, 09:30etik 13:00etara. Gabonetan astegunetan ere goizetan irekitzeko asmoa dute.

IRURAKO JAIALDIKO BIDEOAK

2007-11-26T12:35:00.000-08:00

Irurako kilometroak 2008, gertuago

2007-11-22T11:20:00.000-08:00

Azaroaren 11n, herritarrek txupinazoa bota zuten frontoian 11 hilabeteotako ibilbideari hasiera emateko.

Iluntzean, 20:00etan izan zen hori, baina aurretik ere aurkezpen festa horren lekuko izan da Irurako plaza. Izan ere, arratsaldeko 18:00etatik plaza umez, eta ez hain umez gainezka izan zen, haientzat prestatutako joko eta jolasetan parte hartzeko.

Frontoian, hotzari aurre eginez, iluntzeko jai giroa prestatzen aritu ziren, bitartean. Bi urdaiazpiko moztailek herritarren artean banatzeko platerak prestatzen, musika giroa alaitzen, 20:00ak noiz joko zain.

20:00ak pasatxo zirenean txupinazoa bota zuten, eta horren lekukoa, bertsolariek hartu zuten. Aitor Mendiluze Irurako bertsolaria eta Angel Mari Peñagarikano anoetarrak KMK-08 Iruran ospatzearen beharra nabarmendu zuten, eta Irurako zein eskualdeko herritar guztien parte hartzea eskatu zuten.

Sorkunde Irazu Ikastolako lehendakariak eta Iosune Aiestaran zuzendariak hartu zuten hitza ondoren. Irazuk nabarmendu zuen Ikastolak duela bi urte hasi zuela datorren urtean ospatuko den KMK-08ra eramango dituen bidea, eta gelditzen dena guztien artean egitearen beharra azpimarratu zuen: Ikastolako langile, guraso, irakasle eta ikasleak, eta baita Irurako beste herritar guztiak ere. “Guzti honek hainbat eta hainbat jenderen inplikazioa eskatzen du, eta denen artean egingo dugu”adierazi zuen.

Jarraian antolaketa-prozesuak ordurarte emandakoaren berri eman zuen, osatuak zeuden lan-talde desberdinen aipamena eginez eta bertan parte hartzeko izena eman dutenei eskerrak eta animoak emanez.Iosune Aiestaranek Irurako Ikastolako sortzaileak eskertu nahi izan zituen eta beraientzat txaloak eskatu zituen. Ondoren, bildutakoei eta urte honetan Kilometroak antolatzen lagunduko duten guztiei eskerrak emanez amaitu zuen ekitaldia.

Ondoren, barrikotean, herri afarian eta erromerian 400 pertsonatik gora elkartu ziren, haur, gazte, heldu eta nagusiak, urdaiazpikoa zozketatu zuten.

Afaldu ondoren Izarne eta Markos trikitilariekin erromerian aritu ziren gauerdira arte.

"KILOMETROAK" Herri txiki baten erronka handia ilusio handiz

2007-11-22T10:54:00.000-08:00

Irurako ikastolako 140 haur eta gaztetxoek merezi dute ikastola berria. Urte gutxitan, ixtear egon eta gero, Irurako ikastolako ume kopuruak gora egin zuen eta gaur egun, Udalak utzitako eraikina eta erabiltzen dituzten beste lokalak txikiak geratu dira. Hori dela eta, ikastolako arduradunek Kilometroak 2008 antolakuntza euren gain hartu zuten eta dagoeneko lan horietan dabiltza buru belarri.

Lehen urratsak eman dituzte eta atzoko kasuan, leloa eta logotipoa aurkeztu zituzten Tolosako Leidor zineman. Joxe Mendizabalek zuzendutako jaialdiak bikain bat merezi zuen zioten bertan ikusle gisa izan zirenek. Mendizabalek esan zuenez «dena ondo atera da, jende askoren lana baitzegoen atzetik».

Josune Aiestaran, ikastolako zuzendariak berriz, azpimarratzen zuen jaialdaian nabari zela «guraso gazteen parte hartzea eta hauen ilusioa eta gauzak ondo egiteko gogoa». Hori dena nahasita, aurkezpen ekitaldi borobila sortu zuen eta lanean horrela jarraitzeko hamaika arrazoi. Bitartean, eguneko protagonistak, ikasleak, primeran pasa zuten gainontzeko guztiak bezala.

Kilometroak 2008ko aurkezpena gaur, herritarrei zuzenduta

2007-11-22T10:38:00.000-08:00

Datorren urteko urrian egingo den ekitaldi nagusiari begira, urte guzti honen hasierako txupinazoa botako dute

Irurako Ikastolak Kilometroak 2008aren inguruko lehen ekitaldia antolatu du gaurkorako. Herritarrei zuzendutako aurkezpen jaialdia izango da. Datorren urteko urrian egingo den ekitaldi nagusira begira, urte guzti honi hasiera emango dion txupinazoa izango da ekitaldia.
Hori guztiagatik, herri giroan egin nahi dute jaialdia, herritarrei «dagoeneko egiten ari diren eta egitea tokatuko zaien esfortzua eskertzeko», azaldu du Joxe Mendizabal KM 2008ko koordinatzaileak. Aurkezpen ofiziala Tolosako Leidorren izango da, hilaren 18an.

Bertsolariak eta barrikotea

18:00etan hasiko dira ekitaldiak ume jolasekin. 19:45ean Aitor Mendiluze eta Anjel Mari Peñagarikano bertsolariak ariko dira. 20:00etan txupinazoa botako dute, urte osoa iraungo duen ibilbideari abiapuntua emanez. Ondoren barrikotearen hasiera (bakoitzak bere afaria eman behar du) eta urdaiazpikoaren mozketa. Afalostean, bertsolariak, urdaiazpikoaren zozketa eta erromeria.

IRURA IKASTOLAREN FESTA "Elkartasunaren Kilometroak"

2007-11-20T11:35:00.000-08:00

Irura herri txiki bat dela gauza jakina da dagoeneko. 1.400 biztanle ditu egun eta herrian dagoen eskola bakarra da ikastola. Ikastolan, herriko 106 familiatako 140 haur daude eta bertan 15 langile ari dira gaur egun. Ikastolako ikasleek eta irakasleek 3 eraikin ezberdinetan banatuta daude.

Begi bistan da Irurara hurbilduz gero, eraikin berri baten beharra dutela. Duela hiru urte eraikin berriaren proiektua diseina-tzen hasi ziren eta dagoeneko, 'ikastola berriaren' zutabeak jarrita daude. Lehen urratsak emanak dira proiektu erraldoi honetan, baina orain ametsa egi bihurtzeko 1.800.000 euro behar dituzte. Horietatik, Irurako Udalak 600.000 euro jarriko ditu, baina gainon-tzeko guztia ikastolako guraso, bazkide eta lagunek lortu behar dute. Horregatixe onartu zuten Kilometroak 08 antolatzeko erronka erraldoia. Erraldoia, inoiz Gipuzkoan ez baitu horrelako ikastola txiki batek Kilometroen jaialdirik antolatu.

Txiki baina bizirik

Atzo argi utzi zuten, Gipuzkoako ikastolen elkartearen egoitzan emandako prentsaurrekoan. Bertan, Irurako ikastolako ordezkariak, Josune Aiestaran zuzendaria, Sorkunde Irazu lehendakaria, Joxe Mendizabal KMK08 koordinatzailea, Arantza Manterola GIEko lehendakaria eta Igor Elortza koordinatzailea izan ziren. Josune Aiestaranek bere azalpena egiterakoan ikastolaren ibilbidea azpimarratu zuen. «30 urte ditu ikastolak eta azken urteetan ume kopuruak gora egin du eta beharrak ere handitu egin dira», esan zuen. Gainera, «ikastola txikia da gurea, baina beti Anoeta eta Tolosakoekin harremana estua izan dugu. Herri bakoitzak bere nortasuna mantendu dugu, baina denon artean kalitatezko hezkuntza eskaintzeko gai izan gara».

Elkartasuna

Elkarren arteko harremanei buruz Sorkunde Irazuk hitz egin zuen baita ere: «Irurako ikastolakoek herrian antolatzen diren ekintza guztietan hartzen dugu parte, eta orain, gu denon lagun-tzaren beharra dugu Kilometroak 08 antolatzeko». Bailarako proiektu bat dela azpimarratu zuten Irurako ikastolakoek eta deialdi bat luzatu zien «Tolosaldeko biztanle guztiei parte har dezaten ahal duten neurrian euren laguntza eskaintzeko». Herri txiki bat izan arren, bizirik dagoen ikastola dute Iruran eta lana egiteko prest daudela garbi geratu zen Leidorren, zuzendari esanetan «guraso gazte asko daudelako ilusio handirekin».

kilometroak eraikitzen

2007-11-20T11:01:00.000-08:00

'Eraikitzen' leloarekin ekin dio Irurak Kilometroak 2008ren «erronkari»

Ofizialki hasiera eman dio Irurako Ikastolak Kilometroak 2008ri. Atzo egin zuten prentsaurrekoa Ikastolen Etxean urte bete iraun eta jaialdi erraldoiarekin amaituko den egitasmoari. Eraikitzen leloarekin ekin diote «erronka handi» horri, jasotzen den dirua Ikastolaren eraikin berria ordaintzeko izango dela gogoratuz, eta logo bezala euskal ikur ezaguna oinarri hartuta hiru burukoa irudikatu dute.

Kilometroakeko arroparekin jantzita egin zuten aurkezpena Sorkunde Irazu Ikastolako lehendakariak, Josune Aiestaran zuzendariak, Arantza Manterola GIEko lehendakariak eta Joxe Mendizabal eta Igor Elortza Kilometroak 2008ren koordinatzaileek. «Orain arte jaialdia egin den herririk txikiena da Irura», zehaztu zuen Elortzak. Herri txikia izanagatik ere, «herri bizia» dela gaineratu zuen eta «erronkari aurre egiteko prest» dagoela.

Herri kohesioa

Sorkunde Irazuk Kilometroaken helburuak aipatu zituen. Nabarmenena, Ikastolak herrian sortzen duen kohesioa da. «Irura herri berria da», azaldu du Irazuk, «eta gurasoen arteko harremanak Ikastolaren inguruan gauzatzen dira. Ikastolaren alde herri guztia inplikatzen da: haurrak, gazteak, gurasoak, aiton.amonak...».

Eraikin berria egiten hasi dira dagoeneko. «Lekurik ezak dakar eraikin berri baten apustua», zioen Irazuk. «Etekin ekonomikoa da behar duguna jauzi handi honi buelta emateko». Bestalde, Irurako haurrek egiten duten ikasketa ibilbidea izan zuten hizpide. Iruran hasi, Anoetan jarraitu eta Tolosan bukatzen dute unibertsitate aurreko ikasketak. Hori dela eta, «bailarakide dituen ikastolak gertu izango dira laguntzeko», azaldu zuen Irazuk. Arantxa Manterolak ikastolak «biziak, beharrei aurre egiten dietenak eta ausartak» direla eta «elkartasunezko» kolektibo direla nabarmendu zuen.

Kilometroak 2008ko denda martxan jarriko dute gaurtik aurrera. Tolosako Kale Nagusiko 15. zenbakian dago. Astegunetan 17:00etatik 20:00etara eta larunbatetan 09:30etik 13:00etara eta 17:00etatik 20:00etara egongo da zabalik. Arropak ez ezik, pinak, metxeroak, poltsak eta osagarriak egongo dira salgai. Aurkezpenean gonbitea luzatu zuten bertara erosketak egitera joateko.

Historia pixka bat

Orain 30 urte ireki zituen ateak Irurako Ikastolak. «Herrian kezka bat zegoen: euskara galtzen ari zela», azaldu zuen Josune Aiestaranek. Gazte Alaiak elkartearen inguruan herriko hainbat guraso eta gaztek gaiari heldu zioten. «Egoera ez zen samurra», zioen Aiestaranek, «baina ez zitzaien ilusiorik falta, egungoei falta ez zaien bezalaxe».

Apaizetxeko lokalean abiatu zuten proiektua. 1981. urtean jaso zuten titulartasuna. 1985. urtean egungo egoitzara pasa ziren. Hurrengo urtean, eskola publikoa desagertuta, Ikastola herriko eskola bakarra bezala gelditu zen. Haur Hezkuntza eskaintzen zuten eta gero ikasleak Anoetara joaten ziren ikasketak jarraitzera.

1994an bigarren gela zabaldu zuten. 1996an hirugarren gela eta 2003an LH 1 eta 2 ematen hasi ziren ere. Egun 2 urtetik hasi eta 12 urte bitarteko hezkuntza eskaintzen du Irurako Ikastolak.

Irura Kilometroak eraikitzen hasi da

2007-11-19T13:59:00.000-08:00

Logoa eta lema aukeratu dituzte jada eta arropa ere salgai jarriko dute bihartik aurrera irura eta tolosan

Abiatu da Kilometroak 2008. Tolosako Leidor antzokia lepo, Irurako ikastolako ikasle, irakasle eta gurasoak igo ziren atzo taula gainera aurretik duten urteari begira, bailara guztiko lagunei elkarlanean aritzeko eskatzeko. Izan ere, guztien artean "eraikitzen" hasi baitira jada ikastola berria hartuko duen eraikina eta, hain zuzen ere, lema hori aukeratu dute Irurak datorren urteko urrian hartuko duen Kilometroak festarako: eraikitzen .

Milaka pertsonen aurrean deskubritu zuten Tolosako jaialdian bai lema berria eta baita logo berria ere, hirusta antzeko bat. "Hiru adar ditu Iruran delako, lauburua izango li-tzateke bestela", Kike Amonarriz saioko aurkezleak adierazi zuen bezala. Berarekin, Nerea Alias anoetarra aritu zen taula gainean.

Logoa eta lema aukeratuta, Kilometroetako arropa ere prest dute jada Irurako ikastolakoek eta ikusleei erakusteko desfile berezia egin zuten Leidorren ikasle eta irakasleek, jertse, kamiseta, txano, galtza, poltso eta bufandak soinean, eszenatokia pasarela bihurtuz.
Modeloekin batera, Pirritx eta Porrotx pailazoak ere izan ziren Leidorren eta publiko artean zeuden guraso eta haurrak haiekin abesteko animatu zituzten, azken urteotan hain ezagun bihurtu den Maite zaitut abestiaren doinuak jarraituz. Magia egitera ausartu eta txakur batentzako arropa ere lortu zuten

Kilometroetako logoarekin. Perkusioa eta dantza ikuskizuna izan ziren eta zozketa berezi bat ere bai, Kilometroen antolakuntzak Tolosan bertan bihartik aurrera zabalduko duen dendan arropa eta osagarrietan gastatzeko txekea, hain zuzen ere. Iruran ere biltegi batean salgai izango da arropa.

Irurako ikastolako arduradunek esan dute behin eta berriz herri txikia dutela eta inguruko biztanleen laguntza beharrezkoa izango dutela. Hori dela eta aukeratu zuten Tolosa herritarrei Kilometroak martxan dela jakinarazteko eta, nola ez, lemak dioen bezala, ikastola berria ez ezik, Kilometroak festa ere eraikitzen laguntzeko eskatzeko.

Ikastolak 140 ume ditu eta orain artean hiru eraikinetan daude, Haur Hezkuntzakoak alde batetik eta Lehen Hezkuntzakoak bestetik, Udalak eta irurarrek utzitako lokaletan. Kilometroekin lortuko duten dirua eraikin berria finantzatzeko erabiliko dute. Uda hasierarako bukatuta izatea espero dute eta, beraz, han izango dira datorren ikasturtean.

'Eraikitzen', Kilometroak 08ko leloa

2007-11-19T12:36:00.000-08:00

Urtebete barru Iruran milaka euskaltzale elkartuko dira, bertan ospatuko baita 2008ko Kilometroak jaialdia. «Eraikitzen» leloa ardatz izango du eta hiru buruko euskal ikurra gogora ekartzen duen ikonoa, berriz, logoa izango da. Ikastola berria eraikitzea izango dute helburu antolatzaileek, hiru bide baina proiektu bakarra islatzen duen Irurako Ikastola Kooperatiba Elkarteak.

Ez zen ez ohiko aurkezpena izan atzo Tolosako Leidor Aretoan egin zutena. Ez zen ez mahairik, ez eta bere jiran eserita pertsonarik. Aldiz, ehunka izan ziren aretoko eserlekuetatik Kilometroak ´08ren aurkezpena ikusi, entzun eta gozatu zutenak. Batik bat, haurrak. Agerraldia baino, ikuskizunez betetako ordubeteko jaialdia izan baitzen.

Eguerdiko hamabiak ematekoak zirenean, dozenaka ziren Leidor aretoaren aurreko ilaran prest zeuden gurasoak eta haurrak. Kilometroak ´08 antolatuko duen ikastolaren izaera kontuan izanik, Irurako, Anoetako, Tolosako eta inguruko herrietako lagunak bertaratu ziren; Irurako ikastolak hiru bide batzen baititu, logoak erakusten duen bezala, elkarren ondoan dauden hiru udalerriotan bananduta baititu bere hiru eraikinak.

Jaialdiaren aurkezleak, ostera, beste arrazoi bat ere eman zuen Kilometroak Iruran egingo dela azaltzeko. Logoari so egin eta Iruran izango zela ondorioztatu zuen, «ikurra lauburua izango balitz, Kilometroak Leaburun egingo bailirateke».

Dantza, batukada, «Noaoa»

Txiste kontaketetan duen afizioari muzin egin ezinik ibili zen Kike Amonarriz. Bera eta Nerea Alias telebistako aurkezlea aritu ziren aurkezpen-jaialdiaren gidari lanetan.
Areto osoa ilunpetan zegoela hasi zen ikuskizuna. Bertaratu ziren ehunka haurrak isil-isilik eta adi-adi geratu ziren ahots sakon bat hizketan hasi zenean. Kilometroak bera zen Irurako ikastolako lagunak agurtu zituena eta euskaltzaleen jaialdiaren gakoa zein den aditzera eman zuena: «Ametsak elkartasunaren zutabe sendoetan eraikitzen dira». Segidan, agertokiko lurrean zeuden maindire zuriak zutitu ziren, eta atzeko bi aldamioetan beharginak azaldu ziren, Kilometroak ´08ren leloa eta logoa erakusten.

Maindire zuriak ziruditenak, ordea, Lur dantza taldeko dozena bat dantzari ziren. Dantzaldi ikusgarria eskaini zuten, koreografia berri eta ederrarekin. Hauek ere, beharginak bezala, Irurako ikastola berria «eraikitzen» hasi ziren.

Halako batean, haurrek segituan ezagutu zituzten bi pertsonaia igo ziren oholtzara: Pirritx eta Porrotx pailazoak. Aste honetara arte salmentan egon ez arren, Euskal Herriko pailazo ezagunenek soinean zeramaten Irurako Kilometroak-en elastikoa. Haurren eta ez horren txikien irriak eta algarak eragin ostean, jendez lepo zegoen aretoa mugimenduan jarri zuten, denek «maite zaitut, pila, pila, pila patata tortila» kantatzen zuten bitartean.

Ondoren, pailazoek aurreratu zuten Kilometroak arroparen diseinu guztiak erakutsi zituzten agertokian. Gaurtik aurrera Tolosan izango da 2008ko Kilometroak-en arropa salduko den denda. Atzokoan Irurako ikas-tolako ikasleak eta irakasleak izan ziren diseinu guztiekin desfilatu zutenak. 0-3 urteko haurrekin hasi ziren, nerabezaroko gazteek jarraitu zuten, eta azkenik helduen arropa eraku-tsi zuten. Sorpresa gisa, «Noaoa» umorezko telebista saioko lau kidek ere Leidorren desfilatu zuten.
Bukatzeko, giro ederrean, batukadaren soinuekin ezpata-dantzaren bertsio berritua dantzatuz amaitu zen jaialdia. Baina, aldi berean, Kilometroak antolatzeko lanei hasiera besterik ez zitzaien eman.

KILOMETROAK-08 AURKEZPEN JAIALDIKO ARGAZKIAK

2007-11-18T14:53:00.001-08:00

KILOMETROAK-08 AURKEZPEN JAIALDIKO BIDEOAK

2007-11-18T14:23:00.000-08:00

IKASTOLAREN EGOERA

2007-11-13T02:15:00.000-08:00

"Irura herri txikia da eta ikastolaren inguruan sortzen den kohesioa behar du"

2007-11-12T12:22:00.000-08:00

Iosune Aiestaran kilometroak 2008 antolatzen duen Irurako ikastolako zuzendaria

Aiestaranek dioenez, atzoko festa herritarrek disfrutatu dezaten antolatu zuten, hemendik aurrera lana gogor egitea tokatuko baitzaie denei: "Orain mimatu egin nahi ditugu". Hilabete pasa da lekukoa jaso zenutenetik.

Zeintzuk izan dira lehen egitekoak?

Gure ikastola eta Irurako herria txikiak dira eta jada ia urtebete daramagu lanean, lan batzordeak osatzen, batzordeburuak finkatzen... Bergarako Kilometroetarako jada beharko ditugun lokalak ere bilatuta genituen. Kilometroak 2008ko arropa saltzeko denda Tolosan jarriko dugu adibidez, Kale Nagusian, Kutxak utzitako lokal batean. Hemen, Iruran, beste familia batek lokal handi bat utzi digu biltegi moduan erabiltzeko, bertan arropa sailkatu eta etiketatzeko, eta herriko okindegikoak utzitako beste lokal batean lanean jarraitzeko bulegoa jarri dugu, ikastola berriaren eraikina bukatu arte ez baitaukagu lekurik. Eta beste biltegi handi bat Udalak utzi digu, Bergaratik ekarritako traste guztiak gorde ahal izateko.

Noiztik ari zarete lanean, orduan?

Lehengo urteko martxoan esan ziguten guk antolatuko genuela 2008ko Kilometroak eta ordutik a 100 por hora abiatu ginen. Oso jende ona dugu gurekin lanean, ideia asko dituzte guraso gazteek eta gogoa ere badute. 15 batzorde daude jada osatuta eta gehienak ari dira lanean, bai zirkuitoa prestatu behar duena, segurtasunaz arduratuko dena, montaketa batzordea, garbitasuna, salmenta batzordea, ikuskizunez arduratzen dena... Horiek prestatu zuten atzoko festa Iruran.

Zein helburu zuen festak?

Herritarrei zuzenduta zegoen, eta anoetarrei ere bai, gure umeak gero hara joaten baitira eta lotura handia daukagu Anoetako ikastolarekin. Ume jolasak egon ziren, bertsolariak ere bai, gurasoa den Aitor Mendiluze izan zen eta Angel Mari Peñagarikano ere bai, bera ez da gurasoa baina lanera etorri zen! Txupinazoa eta frontoian barrikotea izan ziren, trikitilariak, urdaiazpiko baten zozketa...

Aurtengo ediziorako aukeratu duzuen lema eta logoa aukeratu dituzue jada?

Bai, eta Tolosako Leidor antzokian egingo dugun ekitaldian emango ditugu jakitera datorren astean, hilaren 18an, eta arropa desfilea ere egingo dugu. Hori izango da Kilometroak 2008ko aurkezpen ofiziala.

Buruan dituzue jada hemendik aurrera eta Kilometroak festa bitartean antolatuko dituzuen bestelako ekimenak?

Herrian urte guztian zehar ekitaldi ugari izango direla badakigu, kirol ekitaldiak, bertsolari gaztetxoenak... Baina zehaztu gabe dago oraindik. Dosifikatu egin behar da! Duela hilabete hasi zen lanean Joxe Mendizabal, koordinatzailea izango dena, batzorde guztiak koordinatuko dituena. Jendeak dituen ideia guztiak ikusita, akuiluarekin ere ibili beharko du batzuetan!

bere hitzetan "300 pertsonak eman dute izena jada antolakuntzan laguntzeko; herri guztia dantzan dabil"

KILOMETROAK 2008KO AURKEZPENA IRURAKO FRONTOIAN

2007-10-31T11:39:00.000-07:00

Irurako ikastola datorren urteko Kilometroak antolakuntzan murgilduta dabil. Urduri baina pozik lanean. Erronka handia baita beraientzat eta nola ez, garran-tzitsua ikastolaren, ikasle eta herriaren etorkizunarentzat. Beharrezkoa baita lortuko duten diru guztia ikastolako eraikuntza berria ordaintzeko.

Hilabete bat besterik ez da igaro, Bergarako lagunen eskutik lekukoa jaso zutenetik, baina dagoeneko, KMK 08ko leloa, logotipoa eta abestia prest dituzte, besteak beste. Hauen aurkezpena datorren azaroaren 18an izango da Tolosako Leidor zineman. Nolabait esateko, aurkezpen ofiziala izango da igande honen zortzi egingo dena, baina aldez aurretik Iruran 'herriko' aurkezpena egingo dutela diote Josune Aiestaran, ikastolako zuzendaria eta Joxe Mendizabal, Irurako KMK08 koordinatzailea «giroa sortzen joateko». Diotenez gainera, jai giroan murgildurik aurkeztuko diete ikastolakoek euren bizilagunei Kilometroak antolatzearen 'proiektu' erraldoia.

Horretarako, bihar arratsaldeko 6:00etan hasita, ume jolasak antolatu dituzte denak ere primeran pasatzeko. Ondoren, ber-tsolarien txanda izango da eta Aitor Mendiluze eta Anjel Mari Peñagarikano kantuan arituko dira. Txupinazo ezin falta Iruran jai egun batean eta biharkoan ere, piztu eta botako dute frontoi inguruan. Barrikotea ere gustokoa dutela eta, irurarrek etxetik ekarritako afari-merienda dastatuko dute Udalak jarritako sagardoarekin. Behin bapo afaldu eta gero, dantza saio batzuk egiteko aukera egongo da trikitilariekin. Arratsaldean zehar, antolatzaileak aditzera eman dutenez Joxe Mari eta Joseba Barriola urdai-azpiko moztaileak pintxoak prestatuko dituzte. Pintxoak noski, urdaiazpikoak izango dira eta hauek dastatzeaz gain, festan parte hartzen dutenen artean urdaiazpiko bat zozketatuko da. Beraz, hitzordu interesgarria prestatu dutena biharko Irurako herri ikastolakoek euren bizilagunen-tzat eta ingurukoentzat.

Denon proiektua, erronka

Zabalik egongo baitira denontzat Irurako pilotalekuko ateak. Zabalik dauden bezala ikastolakoak KMK 08ko antolakuntzan lagundu nahi dutenentzat. Izan ere, Kilometroak 08ko antolakuntza 'proiektuan' denon laguntzaren beharra dutela diote ikastolako ordezkariek. Kontuan izan da Irurak 1.400 biztanle dituela garbi dute Gipuzkoan Kilometroak antolatzen herri txikiena dela eta «ilusio handia» balin badute ere «urduri» ere badaudela. Baina ikastolako 140 ikaslek merezi dute «erronka handi hau aurrera ateratzea» eta horretarako Irura, Anoeta, Tolosa eta inguruko 300 lagunak hasi dira laguntzen eta bileretan parte hartzen. Kopuru hori pixkanaka pixkanaka handitzen joango dela seguru daude, momentuz «ordu asko» sartzen ari dira lehen ekitaldiak antolatzen eta ikusi egin beharko nola ateratzen den.

Biharkoa, lehenengo jaia izango da eta lehen proba gainditzeko aukera paregabea. Dena den, dagoeneko datorren asteko ekitaldiarekin pentsatzen hasiak dira ikastolan. Atzo ikastolan ziotenez biharkoa lotuta dago eta, datorren azaroaren 18an Leidorren egingo den jaialdiarekin pentsatzen ari dira. Mendizabalek eta Aiestaranek egun horretan ere «ordu bete iraungo duen ikuskizun ederra prestatu dugu. Bertan, leloa, logotipoa eta abestia aurkeztuko dira eta baita arropa ere».

Desfile bat egingo da eta 'modeloak' ikastolako ikasleak, izango dira. Beraien ondoan, Anoeta, Ibarra, Laskorain ikastolako eta Inmakulada ikastetxeko lagun batzuk ere izango dira oholtza gainean urtean zehar salduko den arropa erakusten. Bestalde, Joxek eta Josunek esan zutenez «sorpresa asko egongo dira. Gainera, Tolosaldeko eta Gipuzkoako lagun ezagunak hurbilduko dira eta primeran pasatzeko gauza gehiago». Baina ziotenez hilaren 18ra arte «sekretua da». Beraz, hobena bertan izatea izango da. Ikastolakoek gonbitea denoi luzatzen diete aurkezpen jaialdian parte ahrtzeko. Egun horretan Leidorren sortzen diren gastuak ordaintzeko 3 euroko sarrera kobratuko dute, baina zozketak ere egongo dira eta ziotenez sari onak zozketatuko dira bertan.

Erentzun ikastolak 2.000 lagunek Vianan eginiko lana eskertu du

2007-10-24T12:33:00.000-07:00

Atzoko eguna prestatzen urte bete baino gehiago eman ondotik, egundokoa izan behar du dena ongi atera dela ikusteak. Vianako Nafarroa Oinez-ek markak hautsi zituela adierazi zuen komunikabideren batek; oraindik kopuruei dagokienez baloraziorik egin ezin den arren, espero baino parte-hartze handiagoa izan zela adierazi zuen Aritz Lizarragak, Erentzun Ikastolako zuzendariak.

Arazo aipagarririk gabe eta normaltasun osoz joan zen eguna, eta eguraldia ere «ederra» izan zela nabarmendu zuen zuzendari gazteak. Besta hori antolatzeko egindako lanari hain erantzun ona emaeagatik bertaratutakoei eskerrak eman zizkien, baina aipamen berezia merezi izan zuten igandean lanean aritu ziren 2.000tik gora boluntarioek.

Erabat kontent agertu zen zuzendaria lanean ibili zen jendearekin. Errioxako mugan dagoen herri horretan Nafarroa Oinez-en tamainako besta antolatzeko lanetan borondatez arituko diren hainbertze lagun lortzea benetan zaila baita. Erentzun ikastola aitzinera ateratzea ere zaila dela gogorarazi, eta Nafarroa Oinez-ek duen garrantzia goraipatu zuen; 1992an ikastolaren egoitza eraikitzea posible egin zuen orduan, eta oraingoan ere, leku gehiago behar izanik, ikastolaren handitzea eta moldatzea ekarriko ditu. Horregatik, hau guztia posible egin duten boluntarioak, guztira 2.000 baino gehiago, bereziki eskertu zituen. Joan den astean Nafarroa Oinez-en aurtengo edizioa aurkeztu zutenean zailtasunak aipatu, eta artean hutsune batzuk bete gabe zituztela kontatu zuen Lizarragak. Orduan egindako deialdiari indartsu erantzun zion jendeak; aste bete eskas falta zenean, borondatezko laguntza eskaintzeko dei andana jaso zuten Erentzun ikastolan.

Markak hautsiz

Biharamunean datu zehatzak ematea ezinezkoa izanik, irabazitako diru kopurua edo Vianara bertaratutako jendetzaren zenbatekoa datozen egunotan zehaztuko dira. Lehen balorazioan «helburuak bete» direla aurreratu zuen zuzendariak. Besta honetarako espero zitekeen kopurua gainditutzat eman da (100.000 lagun). 2003an Lodosa eta Sartaguda herrietako Nafarroa Oinez-ek hautsi omen zituen ordu arteko marka guztiak (120.000 lagun). Viana ere hurbil ibiliko da.

ERAIKUNTZA 2007-07-23

2007-10-23T14:01:00.000-07:00

ERAIKUNTZA 2007-07-14

2007-10-23T13:35:00.000-07:00

ERAIKUNTZA 2007-07-05

2007-10-23T12:59:00.000-07:00

ERAIKUNTZA 2007-07-23

2007-10-23T12:48:00.000-07:00

ERAIKUNTZA 2007-07-05

2007-10-23T12:37:00.000-07:00

ERAIKUNTZA 2007-06-26

2007-10-23T12:33:00.000-07:00

ERAIKUNTZA 2007-06-19

2007-10-23T12:26:00.000-07:00

ERAIKUNTZA 2007-06-14

2007-10-23T12:08:00.000-07:00

IKASTOLA BERRIAREN ERAIKUNTZA Obrak hasi aurretik

2007-10-23T12:02:00.000-07:00

Nafarroa Oinez Viana 07 Giltza daukagu

2007-10-22T07:32:00.001-07:00

Ikastola berriaren lehen harria ezarri da

2007-10-16T11:44:00.000-07:00

Dantzari eta trikitilariz osaturiko kalejira batek girotu zuen Irurako ikastolaren eraikin berriaren lehen harria ezarri zeneko unea. Irura azken urteotan asko hazi denez, egungo ikastola txiki geratu zitzaien ikasleei zerbitzu duin bat eman ahal izateko.

Lehenengo harria ezartzeko ekitaldian, kutxa bat lurperatu zuten ohikoa den moduan. Bertan, xare bat, eguneko egunkariak, txanponak eta ikastolaren proiektua sartu zituzten kilometroak 2008 festa bertan egingo dute proiektua aurrera eramateko dirua biltzeko

Irurako ikastolako kideek eta udaletxeko ordezkariek herriko ikastola berriaren lehen harria jarriko zuten, larunbatean, Zilar kaleko laugarrenean. Proiektua martxan delako pozarren agertu ziren ikastolako ordezkariak. 12.00etan plazan bildu ziren eta ekitaldi sinbolikoari ekin zioten.

Orain arte Irurako ikastolako ikasleak egoera kaskarrean egon dira. "Apaiz etxean, liburutegian, ludotekan eta Kzgunean ematen ditugu eskolak, ikasle guztiak banatuta ditugu eta egoera ez da jasangarria. Horregatik behar-beharrezkoa dugu eraikin berria", azaldu zuen Josune Aiestaranek ikastolako zuzendariak.

Hasieran bi eta sei urte bitarteko haurrentzako zerbitzua eskain- tzen zuten, ondoren, 0 eta 2 urtekoentzat haur-eskola jarri zuten eta 2004 urteaz geroztik Lehen Hezkuntzako kurtsoak gehituz joan dira. Horrela, orain, LHko bosgarren maila bitarte eskaintzen du Irurako ikastolak eta datorren kurtsoan seigarrena ere eskainiko dute. "115 haur ditugu orain eta, matrikulazioen arabera, irailean 141 izango ditugu. 12 urtera bitarte heziketa osoa eskainiko du ikastola berriak", aipatu zuen Josune Aiestaran, ikastolako zuzendariak.

Irurako ikastola pribatua denez, erakundeen diru-laguntzarik ez du jaso eraikin berria egiteko. Bide honetan, Partaide Ikastolen Federazioak Kilometroak 2008 Iruran egitea onartu du. "Guretzat oso garrantzitsua izango da. Bailarako proiektu bezala ikustea nahi dugu eta laguntza eskatu nahi dugu", gehitu zuen Aiestaranek.

Udalak lursailen lagapena egin du eta 1.500.000 euroko mailegua ordaintzeko 600.000 euro emango dizkio ikastolari. "Haurrak ikastolan hazi eta heztea eta herri bizi bat nahi ditugu", azaldu zuen Marimi Ugalde alkateak.

«Aurrera aterako dugu»

2007-10-15T13:37:00.000-07:00

Bergarako Ikastolak Irurako Ikastolari lekukoa eman dio; urtebete geratzen da orain Kilometroak 2008 prestatzeko

Orain arte Kilometroen protagonismoa Bergarako Ikastolak zuen, bertan egin baita aurtengo Gipuzkoako Ikastolen festa. Baina, dagoeneko, protagonismo hori Irurako Ikastolak du, herenegun Bergarako Ikastolatik lekukoa jaso ondoren. Josune Aiestaran Irurako Ikastolako zuzendariak lekuko aldaketaren unea gogoratzen du: «Urduri geunden, lekukoa eskuetan izateak zer suposatzen zuen jakinik. Baina lekukoa ematearekin batera animoak eman zizkiguten eta egin behar dugun lanarekin disfrutatzeko esan ziguten». Gogoz daudela gaineratzen du: «Herri txikia gara eta oso garbi dugu ahalegin handia egin behar dugula. Denok gaude lana egiteko gogoarekin. Badakigu datorren urteko Kilometroak aurrera aterako dugula eta ondo gainera».

Herenegun ez ziren Irurako Ikastolakoak Bergarara joan lekukoa jasotzera bakarrik. Batzordeetan dauden 45 lagun joan ziren, Bergaran nola antolatu zuten ikustera eta ahal zen neurrian laguntza ematera. «Ondo joan zen dena», dio Aiestaranek. «Eguraldiak lagundu zuen eta horrek ere asko motibatu zuen jende guztia. Bergarako Ikastolakoek harrera oso ona egin ziguten eta nola antolatu zuten ikusi ahal izan genuen». Aiestaranek azaltzen duenen, «bat-bateko harremana» dute Bergarako Ikastolakoekin.

«Batzorde ezberdinetako kideek harreman zuzena dute Bergarako batzordekoekin. Gainera, Ikastolen artean beti laguntzen gara».Iruratik joan zen gurasoetako bat Ana Amonarriz izan zen. Ekonomia batzordean hartzen du parte. «Bergarako Ikastolako ekonomia batzordekoekin geldituta geunden aurretik», dio. «Bertan bizitu ahal izan genuen lanak eta antolamendua. Bertakoekin hitz egin, apunteak hartu eta argazkiak atera ahal izan genituen. Oso harrera ona izan genuen. Laguntzeko prest azaldu ziren edozein momentuan». Animatuta bueltatu dira irurarrak Bergarako esperientziaaren ondoren. «Asko animatu gaituzte», azaldu dute Amonarrizek.

«Oso inpresio ona jaso dugu». Goiz partean batzordeetako partaideekin egon ondoren, arratsaldean festaz gozatu ahal izan zuten. «Guneak nola antolatuta zeuden ikusi ahal izan genuen, dena giro oso onean», zehaztu du Amonarrizek.Lan handia gelditzen da, baina gogoz daudela erakusten dute Irurako Kilometroak prestatzen ari direnek. Bitartean, Ikastolako eraikin berriaren lanak aurrera doaz eta datorren astean igeltseritzako lanak hastea espero dute.

Kilometroak´07 Bergaran bideoklipa

2007-10-15T13:21:00.000-07:00

"Ikastolarik ez dago borroka egin gabe, baina fruitua ematen du"

2007-10-15T12:36:00.000-07:00

Familien lana eskertu zuen Aranzadik eta Irurako ikastolari pasa zion lekukoa

bergara. Aranzadi ikastola 1971.ean sortu zuten. Baina hori baino askoz lehenago, gerra aurreko urteetan jada, ikastola bazen Bergaran. Patxi Azkargorta han izan zen ikasle, eta atzo omenaldia egin zioten Kilometroetan. Udaletxeko areto nagusian izan zen, eguerdian, eta lepo zegoen.

Donostian orduan pisu batzuetan euskarazko eskolak ematen bazituzten ere, Gipuzkoa guztian izan zen lehen ikastola izan zela Bergarakoa gogoratu zuen Azkargortak, eta gaur egun farmazia bat dagoen lokalean zegoela. Ikasle garaikoak ekarri zituen gogora bergararrak, "lotsatuta" eta apur bat emozionatuta udaletxean bildutakoen aurrean hitz egitea tokatu zitzaionean. Bergarako "euskerie" aldarrikatu eta berak herritik kanpora lan egin behar izan zuela gogoratu zuen, Azpeitiko ikastola sortzeko lanetan aritu baitzen. Eta Jesuitekin ikastetxea zabaltzea lortzeko lana gogor egin behar izan zutela onartu zuen: "Borrokan egin barik, ez dago ikastolarik, baina fruitua ematen du gero".

Azkargortaz gain, Bergarako familiak omendu zituzten atzo Aranzadikoek, "izan direnak, direnak eta izango direnak, ikastolako proiektuan sinistu dutelako". Guztien izenean plaka oroigarri eta lore sorta bana jaso zuten Felix Altuna ikastolak izan zuen lehen presidenteak, eta honen emazteak, eta baita egungo lehendakari Anjel Mari Egurenek eta bere emazteak ere.

Omenaldiak umore puntua ere izan zuen, Mikel Laskurain aktore ezagunaren eskutik. Besteak beste, euskara laguntzeko Kilometroak eta hizkuntzaren aldeko festak egitea bai, baina "berba egitea" ere beharrezkoa dela gogoratu zuen.

lekukoa, irurara Azkenik, Aranzadi ikastolako zuzendari Patricia Urrutiak eta Egurenek lekukoa eman zieten udaletxean Irurako ikastolako ordezkariei, haiek izango baitira 2008ko Kilometroak antolatzeko arduradunak.

Josune Aiestaran zuzendariak Irura herri txikia dela, baina bailarako herritarren laguntza ere izango dutela Bergarakoa bezalako festa antolatzeko nabarmendu zuen.

Irurako ikastola berriko lehen harria jarriko dute larunbatean

2007-10-15T12:09:00.000-07:00

kilometroak 2008 festa bertan egingo dute proiektua aurrera eramateko dirua biltzeko

irura. Irurako ikastolako kideek eta udaletxeko ordezkariek herriko ikastola berriaren lehen harria jarriko dute, larunbatean, Zilar kaleko laugarrenean. Proiektua martxan delako pozarren agertu ziren atzo ikastolako ordezkariak. 12.00etan plazan bilduko dira eta ekitaldi sinbolikoari ekingo diote.

Orain arte Irurako ikastolako ikasleak egoera kaskarrean egon dira. "Apaiz etxean, liburutegian, ludotekan eta Kzgunean ematen ditugu eskolak, ikasle guztiak banatuta ditugu eta egoera ez da jasangarria. Horregatik behar-beharrezkoa dugu eraikin berria", azaldu zuen Miguel Amenabar, ikastolako lehendakariak.

Hasieran bi eta sei urte bitarteko haurrentzako zerbitzua eskain- tzen zuten, ondoren, 0 eta 2 urtekoentzat haur-eskola jarri zuten eta 2004 urteaz geroztik Lehen Hezkuntzako kurtsoak gehituz joan dira. Horrela, orain, LHko bosgarren maila bitarte eskaintzen du Irurako ikastolak eta datorren kurtsoan seigarrena ere eskainiko dute. "115 haur ditugu orain eta, matrikulazioen arabera, irailean 141 izango ditugu. 12 urtera bitarte heziketa osoa eskainiko du ikastola berriak", aipatu zuen Josune Aiestaran, ikastolako zuzendariak.

Irurako ikastola pribatua denez, erakundeen diru-laguntzarik ez du jaso eraikin berria egiteko. Bide honetan, Partaide Ikastolen Federazioak Kilometroak 2008 Iruran egitea onartu du. "Guretzat oso garrantzitsua izango da. Bailarako proiektu bezala ikustea nahi dugu eta laguntza eskatu nahi dugu", gehitu zuen Aiestaranek.

Udalak lursailen lagapena egin du eta 1.500.000 euroko mailegua ordaintzeko 600.000 euro emango dizkio ikastolari. "Haurrak ikastolan hazi eta